786 Бардыгы /

Мамлекеттик салык кызматы Ош облусуна караштуу Кара-Суу базарында иштеп жатышкан ишкерлер көзөмөл-кассалык машиналарды (ККМ) колдонуудан бошотула тургандыгын шардана кылды. Мекеменин басма сөз кызматы тараткан маалыматка караганда, ушул жылдын 29-ноябрында Кара-Суу райондук мамлекеттик акимчилигинин алдына нааразычылык акциясына чыгышкан соодагерлер тарашып, соодасын кадимкидей улантып жатышат.

    Салык мыйзамдарына ылайык, Кыргызстанда стратегиялык обьектилерге кирген базарлардагы ишкерлер өзгөчө салык режими менен иштей алаары айтылды. Ушул тапта стратегиялык обьектилерге Бишкектеги “Дордой” жана Кара-Суудагы “Тураталы базары” (автордон – Кара-Суу базары) базарлары кирет. Булар 2024-жылдын 1-январынан тартып өзгөчө режимдеги зонанын ичинде товарларды сатууда көзөмөл-кассалык машиналарды (ККМ), товардык-транспорттук коштомо кагаздын электрондук түрүн (ЭТТН) жана электрондук эсеп-фактураны (ЭЭФ) колдонуудан бошотулушат.

    ККМ – бул товар сатуу жана кызмат көрсөтүү үчүн керектелген эсептөөчү аппарат. ЭТТК – товар, жөнөтүүчү, алуучу жана жеткирүүчү транспорт каражаты жөнүндө маалыматтарды жана башка маалыматтарды камтыган электрондук документ. ЭЭФ – кошумча нарк салыгын эсептөө үчүн керектелген, товар саткан жана кызмат көрсөткөн тарап толтура турган конкреттүү үлгүдөгү салыктык документ.

Алишер ТОКСОНБАЕВ, өз кабарчы