648 Бардыгы /

    Баткен облусунун борбору Баткен шаарында бала бакчага баруу үчүн кезекте миңден ашуун бала турат. Бул туурасыда шаардык мэрия билдирди.

    Маалыматка караганда, ушул тапта Баткен шаарында азыр мамлекеттик алты бала бакча иштеп жатат. Алар жалпы 626 орунга ылайыкташканы менен 1400дөн ашык бала тарбияланышууда. Ал эми алты менчик бала бакчага 400дөй жеткинчек барат. Бала бакча тартыш болгондуктан, жергиликтүү бийлик 2024-жылы АРИС уюму менен биргеликте 140 орундуу бала бакча курууну караштырып жатат.

    Дээрлик 35 миңдей киши жансактаган Баткен шаарында кээ бир бала бакчалардын имараттары облустук мекемелерге берилип кеткен. Кыргызстанда Бишкек, Ош, Жалал-Абад сыяктуу ири шаарларда дагы бала бакча маселеси абдлан курч. Кыргыз Өкмөтү  буга дейре менчик бала бакча иштеткендерге жеңилдиктер берилээрин жарыялаган. Балдарды бакчага орноштуруудагы коррупцияны жоюу максатында электрондук кезекке туруу системасы иштеп жатат.

Алишер ТОКСОНБАЕВ, өз кабарчы