1,137 Бардыгы /

Улуттук коопсуздук боюнча мамлекеттик комитетинин (УКМК) басма сөз кызматы Жалал-Абад облусунун Сузак районунда “Йакын инкар” диний-экстремисттик агымынын ишине бөгөт коюлгандыгын билдирди. Атайын кызматтын маалыматына караганда, ушул жылдын 28-ноябрында Сузакта “Йакын инкардын” активдүү мүчөлөрү кармалышып, УКМКнын тергөө абагына киргизилди. Аларга Кылмыш-Жаза Кодексинин “Экстремисттик уюмду түзүү жана каржылоо” беренеси менен айып тагылды.

    Сузакта кармалгандар аталган райондун аймагында экстремисттик идеологияны жайылтуу жана таратуу боюнча иш алып барышкандыгы аныкталды. Диний көз караштарынан улам светтик жашоону чанып, балдарына орто билим берүү мекемелерине барууга, эмдөөдөн өтүүгө жана башка медициналык процедураларга тыюу салышкан. Баса, шектүүлөрдүн жашаган жерин тинтүүдө “Йакын инкар” диний-экстремисттик агымына тиешелүү адабияттар табылып, алынган материалдардын негизинде соттук-диний экспертиза дагы дайындалды.

    Баса, “Йакын инкар” диний агымы – “Таблиги жамаат” уюмунун ичинен бөлүнүп чыккан өзүнчө топ. Анын мүчөлөрү өздөрүн “пайгамбардын жолун жолдоочуларбыз” деп эсептешет. Бул диний агым 2017-жылы экстремисттик деп табылган. Мындан тышкары сот тарабынан 2003-жылдан бери баш-аягы 21 диний бирикменин ишмердигине террорчул жана экстремисттик уюм катары Кыргызстандын аймагында тыюу салынган. Ага “Жабхат ан-Нусра”, “Жайшу л-Махди”, “Ансару л-Лах”, “Хизб ут-Тахрир ал-Ислами”, “Жихад тобу” жана “Чыгыш Түркстан Ислам кыймылы” сыяктуу эл аралык террордук жана экстремисттик уюмдар кирген.

Алишер ТОКСОНБАЕВ, өз кабарчы