810 Бардыгы /

Мамлекеттик салык кызматынын төрагасы Алтынбек Абдувапов 14-декабрда маалымат жыйында базарларда контейнерлердин ижара акысын арзандатуу боюнча да иштер жүрүп жатканын билдирди.

Анын айтымында, ижаранын арзандаганы келерки айда байкалат.

Абдувапов быйыл 11 айда Кыргызстанда 225 млрд 744 млн сом салык жана камсыздандыруу төлөмдөрү чогулганын, бул пландан 3,9 млрд сомго көп экенин маалымдады. Салыктын көп чогулганына салыктык башкаруунун жакшырышы жана ишкерлердин онлайн тейлөөгө өтүшү себеп экенин белгиледи.

Келерки жылдын июль айына чейин Көзөмөл-кассалык машинелерди колдонбой, патент системасы менен иштөөгө берилген уруксат базардагы соодагерлерге гана тиешелүү экенин кошумчалады.

Улуттук коопсуздук комитети Бишкектеги жана өлкө аймагындагы бир катар базар ээлери ижара акыны төмөндөтүүгө макул болгонун билдирип, алардын тизмесин улам кеңейтип жарыялап жатат.

6-декабрда УКМК төрагасы Камчыбек Ташиев “базарлардын ээлери соодагерлерге шарт түзбөсө, ижара акыларын төмөндөтпөсө, базарларды мамлекетке өткөрүүгө саясий эрк жетиштүү” деп билдирген.

Ал кол алдындагыларга “базар ээлерин көзөмөлдөөнү, алардын ижара акыны көтөрүүсүнө жол бербөөнү” тапшырган. Ири соода-сатык комлпекстеринин ээлерин өлкөдөгү эң бай адамдар катары сыпаттап, Аскар Салымбеков, Мелис Мырзакматов, Чолпон Султанбекова, Турсунтай Салимов, Курманбек Байтереков, Камчыбек Жолдошбаев, Кубатбек Байболов, Элвира Сурабалдиева, Чыңгыз Алкановдун аттарын атаган.

Жогорку Кеңештин депутаты Чолпон Султанбекова мамлекет жана Конституция жеке мүлктү коргоого алышы керектигин, эгер базарларга тышкы башкаруу киргизиле турган болсо ал рейдерлик басып алуу болуп каларын айткан. Дагы бир депутат, “Кудайберген” базарынын ээси Элвира Сурабалдиева бизнеске эркиндик керектигин “Азаттыкка” билдирген.

Министрлер кабинетинин көзөмөл-кассалык машинелерди киргизүү демилгесинен кийин ноябрдын аягында, декабрдын башында бир катар базарларда ишкерлер нааразылык акциясына чыгышкан.

5-декабрда президент Садыр Жапаров “Дордойдо” соодагерлер менен жолугуп, алардын талаптарын уккан. Андан кийин “Кабар” улуттук маалымат агенттигине курган маегинде “эгер соодагерлердин митинги токтобосо, бийлик базарларга “Кумтөр” сыяктуу эле тышкы башкаруу киргизерин айткан.

WWW.