414 Бардыгы /

Ушул жылдын башында  Жогорку Кеңештин үч окуусунан тең өткөн “Туризм жөнүндө” мыйзамга өзгөртүүлөр киргизилип, акыры президент Садыр Жапаров кол койду.  Бул туурасында Туризм департаментинин башчысынын орун басары Кыял Кенжематова шардана кылды.

Туризм департаментинин башчысынын орун басары Кыял Кенжематованын айтымында, быйыл туристтик ресурстардын маалыматтык тутумун (Туристтик атлас) түзүү дагы пландалып жатат. Муну үчүн аймактарды толук кыдырып, кайсы туристтик ресурсту колдонуу керектиги дагы өзүнчө такталат.

-Мамлекет башчысы 2024-жылдын 10-январында туризм боюнча

мыйзамга өзгөртүүлөр сунушталган жаңы мыйзамга кол койду. Жаңы мыйзам жалпы жонунан үч өңүттө туруктуу иш алып барат.Биринчиси — туризмди туруктуу өнүктүрүү жана туруктуу туризм деген түшүнүктөрдүн кириши. Туризмди туруктуу өнүктүрүү багытында биз маданиятты, тарыхты, жер-жерлердеги экономиканы эске алуу менен экологияга келтирилген зыянды мүмкүн болушунча азайтууга багытталган туристтик иш-чаралар деп түшүнсөк болот. Ал эми туруктуу туризмде узак мөөнөттүү долбоорлорго басым жасалат. Биз Дүйнөлүк туристтик уюмга мүчөбүз. Аталган уюмдун туруктуу Туризм Кеңеши глобалдык критерийлерди иштеп чыккан. Ар бир өлкөнүн өзгөчөлүгүнө жараша ошол критерийлерди киргизсе болот. Экинчи багыт — туризм тармагындагы кызмат көрсөтүүлөрдүн сапатын заман талабына жараша жогорулатуу. Мында мейманканалардын акыбалы, деңгээли жана атаандаштык тууралуу кеп болууда. Туристтердин мүмкүнчүлүгүнө жараша Азия өнүктүрүү банкынын колдоосу аркасында Кыргызстан жана Казакстанга мейманканалардын классификациясы иштелип чыкты. Ал эми үчүнчү багыты — туризм чөйрөсүндө иш алып барууну жөнгө салуу. Учурда ЕАЭБдин туризм рыногу биздин талаптарыбызга кызыгып жатат. Азыр рынок уруксат кагазы менен иш алып барчу учурга жетти. Мурдагыдай лицензия менен иштөө деген жок. Муну менен катар мамлекеттик деңгээлде туристтик ишмердүүлүктүн субьектилеринин ишмердиги кызмат көрсөтүүлөр тууралуу толук маалыматты камтыйт, — деп кошумчалады Туризм департаментинин башчысынын орун басары Кыял Кенжематова.

Туризм департаментинин башчысынын орун басары Кыял Кенжематова 2024-2028-жылдары Кыргызстанда орто мөөнөттө туруктуу туризмдин критерийлерин киргизүүнү максат кылып жатышкандыгын дагы кошумчалады.

          Алишер  ТОКСОНБАЕВ, өз кабарчы