267 Бардыгы /

          Ош облусунун Араван районунда жазгы талаа жараяны башталды. Бул туурасында президенттин Ош облусундагы Өкүлчүлүгүнөн билдиришти. Облус  башчысы Элчибек Жантаев жазгы талаа иштери менен жеринде таанышып, картөшкө жана капуста отургузуу иштерине өзү катышып, ошондой эле дыйкандар менен дагы жолугушуп, алардын муң-зарын жеринде тыңдады.

          Ош облусунун башчысыЭлчибек Жантаев аравандык дыйкандардын көңүлүн быйылкы сезондо органикалык жер семирткичтерди колдонуунун маанилүүлүгүнө буруп, ар тараптуу колдоо болоорун убадалады. Дыйкандарга ар кандай маселеде жергиликтүү бийлик менен дайыма байланышып турууга, ошондой эле ирригация жана айыл чарба процессинин башка аспектилери боюнча активдүү кызматташууга үндөдү.

          – Араван районунда жазгы талаа жумуштарынын башталышы – өлкөбүздө сезонго жасалган алгачкы кадам. Биз дыйкандарга жагымдуу шарттарды түзүү боюнча жигердүү иш алып баруудабыз жана мындан ары да ар тараптуу колдоо көрсөтүүгө, ошондой эле алардын түшүмүн сатууга жана экспорттоого, суугат суу менен өз убагында камсыздоого болгон аракеттер көрүлөт, – деп катуу убадалады президенттин Ош облусундагы Өкүлү Элчибек Жантаев

          Мындан тышкары Ош облусунун башчысы Элчибек Жантаев Араван районундагы ирригациялык системалардын даярдыгы, арыктарды, каналдарды тазалоо иштери менен таанышып, буга чейинки берилген тапшырмалардын аткарылышын дагы текшерди. Ошондой эле жумушчу сапарынын соңунда жергиликтүү калк менен биргеликте картошка эгип, тургундардын көйгөйлөрүн угуп, жергиликтүү бийликке тиешелүү тапшырмаларды берди.

          Алишер  ТОКСОНБАЕВ, өз кабарчы