486 Бардыгы /

Кыргызстандын жарандарынын ден соолугун коргоого багытталган “Саламаттыкты сактоо тармагындагы глобалдык коопсуздук жана пандемияга даярдык” Программасы өз ишин баштады. Бул – Америка Кошмо Штаттарынын, Кыргыз Республикасынын, БУУнун Азык-түлүк жана айыл чарба Уюмунун, Дүйнөлүк саламаттыкты сактоо Уюмунун жана башка уюмдардын консорциумунун биргелешкен демилгеси, ошондой эле бул саламаттыкты сактоо тармагындагы өзгөчө кырдаалдарга карата өлкөнүн туруктуулугун бекемдөөчү инвестиция дагы болуп саналат.

          Ошентип, “Саламаттыкты сактоо тармагындагы глобалдык коопсуздук жана пандемияга даярдык” Программасы Кыргыз Республикасы тарабынан аныкталган жети негизги багыт боюнча гана ыкчам иштейт:

          – Микробдордун дары-дармекке туруктуулугун көзөмөлдөө жана азайтуу;

          – Зооноздук ооруларга мониторинг жүргүзүү (жаныбарлар жана адам ортосундагы оорулар);

          – Улуттук лабораториялык системаларды чыңдоо;

          – Ооруларды такай көзөмөлдөө;

          – Медициналык кадрлардын дараметин жогорулатуу;

          – Тобокелдиктер тууралуу маалымдоо жана коомчулук менен байланышуу боюнча стратегияларды иштеп чыгуу;

          – Саламаттыкты сактоо тармагындагы өзгөчө кырдаалдарды башкарууга көмөктөшүү.

          Аталган Программа адамдардын, жан-жаныбарлардын жана экосистемалардын ден соолугун туруктуу тең салмактоо жана оптималдаштырууга багытталган БУУнун «Бирдиктүү ден соолук» ыкмасын колдонот. Бул көп секторлуу стратегия Кыргыз Республикасынын Саламаттык сактоо министрлигинин, Суу ресурстары, айыл чарба жана кайра иштетүү өнөр жай министрлигинин жана Жаратылыш ресурстары, экология жана техникалык көзөмөл министрлигинин ортосундагы тыгыз кызматташтыкта гана жүзөгө ашырылат.

          – Америка Кошмо Штаттарынын Өкмөтү саламаттыкты сактоо тармагындагы глобалдык коопсуздукту өзүнүн эң негизги беш приоритетинин бири деп эсептейт. Бүгүнкү иш-чара Кыргызстандагы саламаттыкты сактоону жакшыртуу боюнча биздин көп жылдык кызматташтыгыбыздын кезектеги бөлүгү десек эч жаңылышпайбыз. Биз COVID-19 пандемиясынын учурунда дагы тыгыз иштешип, пандемиядан кийинки калыбына келтирүү фазасында деле кызматташуубузду туруктуу уланттык. Биз кургак учук жана ВИЧ-СПИДди аныктоо жана дарылоодо дагы олуттуу ийгиликтерге гана жетиштик. Биздин Өкмөттөрүбүздүн биргелешкен иш-аракеттеринин натайжасында көптөгөн адамдардын өмүрү сакталып дагы калды. Өткөн жылы Ден соолук коопсуздугун камсыздоо боюнча иш-аракеттердин Улуттук Планын өз убагында кабыл алышы менен Кыргыз Республикасы саламаттыкты сактоо системасынын келечектеги ар кандай пандемияга даярдыгын күчөтүүдө алдыңкы ролду ойноп жатат, – деп агынан жарылды АКШнын Кыргызстандагы элчиси Лесли Вигери.

– Биз USAIDдин каржылоосу Ден соолук коопсуздугун камсыздоо боюнча иш-аракеттердин Улуттук Планынын негизги бөлүктөрүн колдоодо маанилүү роль ойнойт деп ишенебиз! «Саламаттыкты сактоо тармагындагы глобалдык коопсуздук» Программасын жүзөгө ашыруу биздин өлкөгө калктын ден соолугун коргоо жаатындагы коркунучтарга жооп кайтаруу үчүн туруктуу негиз түзүүгө мүмкүндүк жаратат, – деп өз сөзүндө баса белгиледи Кыргыз Республикасынын саламаттык сактоо министринин орун басары Бүбүжан Арыкбаева.

          Айтмакчы, Америка Кошмо Штаттары саламаттыкты сактоо системасын чыңдоо жана бардык кыргызстандыктар үчүн коомдук саламаттыкты сактоонун көрсөткүчтөрүн жакшыртуу максатында Кыргыз Республикасы менен 1995-жылдан бери ээле ийгиликтүү кызматташып келатат.

Алишер  ТОКСОНБАЕВ, өз кабарчы