573 Бардыгы /

Үстүбүздөгү жылдын 14-мартынан тартып Жалал-Абад облусунда кызамыкка каршы эмдөө үчүн 159 миң доза вакцина келип, аймактагы калкты жапырт эмдөө башталды. Бул туурасында Саламаттык сактоо министрлигинин Жалал-Абад облусу боюнча координатору Каарманбек Байдавлетов билдирди.

          – Облусубузга кызамык менен кызылчага каршы 159 миң доза вакцина алып келинди. Аймакта жашагандардын 98 пайызын эмдөөдөн өткөрөбүз деп турабыз. Ал эми буга чейин адамдардын 20 пайызы аталган ооруларга каршы эмдөөдөн өткөрүлгөн, – деди Саламаттык сактоо министрлигинин Жалал-Абад облусу боюнча координатору Каарманбек Байдавлетов.

          Кыргызстанда үстүбүздөгү жылдын 7-мартына карата кызамык жуктургандардын саны 4 855 адамга жетти. Илдетти жуктургандар Бишкек шаарында, Чүй, Ош жана Жалал-Абад облустарында абдан арбын. Саламаттык сактоо министрлиги аталган илдеттин жайылышына ата-энелер түрдүү себептер менен эмдөөдөн баш тартып жаткандыгы себеп болгондугун билдирип келет. Министрликтин маалыматына караганда, Кыргызстанда баласын кызамыкка каршы эмдетүүдөн баш тарткан ата-энелер 22 миңге жеткен. Булардын көбү мындай чечимге диний түшүнүктөн улам барып жатышат. Ушундан улам министрлик Дин иштери боюнча мамлекеттик комиссиянын, муфтияттын өкүлдөрү менен кызамык жана ага каршы вакцина тууралуу талкуу жүргүзүп, дин өкүлдөрүнөн бул жаатта маалымат таратууга көмөктөшүүнү суранып келатат.

          Кыргызстанда кызамык оорусу 2023-жылдын башында Бишкек шаарында башталган. Түркиядан жана Орусиядан жуктуруп келген учурлар дагы катталгандыгы кабарланган. Кызамыкка каршы эмдөө адатта бала бир жашка толгондо жана алты жашка чыкканда жасалат. Кошумча эмдөөлөр тогуз айлык ымыркайдан тартып жети жашка чейинки балдарга үй-бүлөлүк дарыгерлер борборунда акысыз жүргүзүлүүдө.

Алишер  ТОКСОНБАЕВ, өз кабарчы