462 Бардыгы /

ЖАЛАЛ-АБАД. Жалал-Абад ОИИБдин башчысы кызматына жаӊы дайындалган милициянын полковниги Марлис Асанов облустагы Сузак, Базар-Коргон, Майлуу-Суу, Ноокен жана Жалал-Абад шаар-райондук ички иштер бөлүмдөрүнө барды.

Жалал-Абад ОИИБдин басма сөз кызматы билдиргендей, Марлис Асанов жеринде ШРИИБдин өздүк курамы, алардын иштөө шарттары жана ишмердүүлүгү менен таанышып чыкты. Ошондой эле 2024-жылдын 1-чейрегинде аткарылган жумуштарын кароо боюнча, оор жана өзгөчө оор кылмыштарга токтолуп, юридикалык туура баа берилип, сапаттуу тергелишине басым жасап өттү.

Жыйындарда өздүк курамга кылмыштуулук менен күрөшүүдө, коомдук тартипти, жол кыймылынын коопсуздугун камсыздоодо, элге сервистик тейлөө көрсөтүүдө талыкпай чын дилден эмгектенип, жарандардын арыздары кыска мөөнөттө каралып, элдин милицияга болгон ишеничин арттыруу керектигин эскертип, бир топ талаптарды койду.

Ошону менен катар, ар бир кызматкерди кызматтык тартипти, мыйзамдуулукту сактап, ар кандай мыйзамсыз көрүнүштөрдөн алыс болууга чакырып, бул багытта көзөмөл күчөтүлөрүн белгиледи.

Ал эми, Жалал-Абад ОИИБдин ардагерлер кеӊешинин төрагасы Капар Исаков жолугушууда өздүк курамга акыл-насааттарын айтып, жаш кызматкерлерди чынчылдыкка, берилген тапшырманы өз убагында аткарып, жарандар менен сылык мамиледе болууга үндөдү.