294 Бардыгы /

Өткөн ишемби жана жекшемби күндөрүндөгү нөшөрлөп төккөн жамгырдан кийинки сел Ош облусунун Алай, Кара-Кулжа, Өзгөн жана Кара-Суу райондорунун бир катар айылдарын тегзи каптады. Ошол себептүү ушул жылдын 22-апрелинен тартып аталган облустун аймагында өзгөчө кырдаал режими киргизилди.

• Табият кырсыгынан эки адамдын өмүрү кыйылды. Бири

селге агып кетсе, ал эми экинчисине чагылган тийип каза тапты, – дейт Өзгөчө кырдаалдар министрлигинин Ош облусу боюнча башкармалыгынын башчысынын орун басары Нурбек Исмаилов. – Эки күн катарынан жааган жамгырдан ар кандай жаратылыш кырсыктары дагы катталды. Маселен, Кара-Кулжа райоунун борборунан Алайкууга бараткан унаа селге агып, 1979-жылы туулган Сатыбалдыев аттуу жаран жеринде каза тапты. Автоунаада беш жүргүнчү жайланышкан экен. Булардын тышкары Кара-Суу районунун Баш-Булак айылында чагылган түшүп, 2007-жылы туулган жаран көз жумду. Аны ооруканага алып келишкен, бирок, тилекке каршы, доктурлар сактап кала алышкан эмес!

        Баса, Ош облустук бийлиги аймактагы беш райондо сел жүргөндүгүн, алдын ала эсептөөлөр боюнча 150дөй турак жай жаапа чеккендигин ырастады. Президенттин Ош облусундагы ыйгарым укуктуу Өкүлүнүн орун басары Шайлообек Козубаевдин айтымында, ушул тапта чыгымдарды тактоо улантылып жатат: – Ушул тапта бардык райондорду кыдырып жүрөбүз. Жалпы чыгымдар боюнча штабдын атайын жыйынында такталып айтылат. Азырынча Өзгөчө кырдаалдар министрлиги тарабынан дагы ырааттуу түрдө мониторинг жүргүзүлүп жатат.

Айтмакчы, Президенттин Ош облусундагы ыйгарым укуктуу Өкүлүнүн орун басары Шайлообек Козубаев Аймакта жарыяланган өзгөчө кырдаал режими дагы канчага созулаарын айткан жок…

Алишер  ТОКСОНБАЕВ, өз кабарчы