294 Бардыгы /

«Мегакомпани» ЖЧКсына таандык бажы терминалы жер тилкелери менен чогуу мамлекеттин карамагына биротоло өткөрүлдү. Бул туурасында УКМКсынын басма сөз кызматынан билдиришти.

Атайын кызмат социалдык тармактарда Ош облусунун Кара-Суу районунун Жоош айылында жайланышкан, буга дейре Жогорку Кеңештин мурунку депутаты Токтобүбү Оргалчага таандык бажы терминалы туурасында видео тасмалар тарап жаткандыгын белгиледи. Буга байланыштуу УКМК март айында «Мегакомпани» ЖЧКсынын ишинин жана жер тилкесин алуунун мыйзамдуулугун текшерген. «Терминал Талдык дарыясынын жээгиндеги сууну коргоочу аймакка уруксат документтери жок курулгандыгы аныкталды. Ал эми ижара келишиминин шарттарына ылайык, ижарачы алынган аймакты жашылдандыруу жана көрктөндүрүү менен алектениши керек болгон, тилекке каршы, ал иштер аткарылган эмес!

Жалпы аянты 7,49 гектар жер тилкеси Мамлекеттик бажы кызматынын алдындагы «Бажы инфратүзүмү» ишканасынын балансына өткөрүлдү. Жер тилкелеринин болжолдуу баасы 520 миллион сомдон ашат. Ушул тапта терминалдын өзүнүн мүлкүн өткөрүп берүү жараяны кызуу жүрүп жатат. Алдын ала эсептөөлөр боюнча анын баасы кошумча 54 миллион сомду түзөт.

УКМК аталган жер тилкесин «Мегакомпани» ЖЧКсы пайдаланган учурда бюджетке салыктык чегерүүлөр түрүндө гана аз өлчөмдө сумма түшүп тургандыгын, ал эми жер тилкеси мамлекетке өткөндөн кийин 22 миллион 188 миң 500 сом түшкөндүгүн кошумчалады.

Алишер  ТОКСОНБАЕВ, өз кабарчы