351 Бардыгы /

ЖАЛАЛ-АБАД. 2024-жылдын 2-май күнү Сузак районунда болгон окуяны иликтөө үчүн түзүлгөн ведомстволор аралык комиссия ички иштер башкармалыгы боюнча жүргүзүлгөн кызматтык иликтөөнүн жыйынтыгын чыгарды.

Жалал-Абад ОИИБдин басма сөз кызматы билдиргендей, Сузак районунда өткөрүлгөн иш-чара учурунда коопсуздук маселесин өз деӊгээлинде камсыздабай жана алдын алуу иш-чараларын так жүргүзбөгөндүгү үчүн жалпы 12 (он эки)  кызматкер тартиптик жазаларын алышты.

Алардын ичинен Сузак РИИБдин башчысы, анын орун басары жана иш-чара өткөрүлгөн аймакты тейлеген Октябрь аймактык милиция бөлүмчөсүнүн башчысы ээлеген кызматтарынан бошотулду.

Андан сырткары Жалал-Абад ОИИБдин жетекчилик курамына жана Сузак РИИБдин жол кыймылынын коопсуздугун камсыздоо бөлүмүнүн бир нече  кызматкерлерине карата  тартиптик чаралар көрүлдү.

Эске сала кетсек, 2-майда саат 11:30дар чамасында Сузак районунун Көк-Арт айыл өкмөтүнүн Катмы эс алуучу жайында Манас айтуу боюнча республикалык кароо-сынактын алкагында флешмобго катышып жаткан окуучуларды Hyundai Porter унаасы белгисиз себептерден токтоп турган жеринен жылып, окуучуларды катарынан тебелеп кеткен. Мунун кесепетинен 32 адам ар кандай даражада жараланган. Сузактагы сынак учурунда окуучуларды унаа сүзүп кеткен окуяга байланыштуу соңку саатта балмуздак жүктөлгөн жүк ташуучу  Hyundai Porter унаасынын айдооочусу камакка алынган. 48 жаштагы айдоочунун көрсөтмөсүнө караганда, ал балдарга бекер балмуздак таратканы үчүн баргандыгын, Жерге-Тал айылдык мектебинин директорунан таттууну кайсы жакка жеткирүү керек экенин сурап телефон чалып жатканда, машинасы ылдыйга түшүп кеткенин, артынан токтотконго жетишпей калгандыгын моюндаган.