432 Бардыгы /

ЖАЛАЛ-АБАД. Ала-Бука районунун Райымбек Кулуев атындагы №11 жалпы орто билим берүүчү мектебинде окуп жана таалим –тарбия алып кеткен Кажар, Келте, Кашкалак айылынын илимдүү, билимдүү атуулдарынын мектептин материалдык-техникалык базасын чыңдоо менен бирге окуучулардын аскерге чейинки даярдыгынын сапатын жакшыртуу багытындагы жогорку деңгээлдеги иш-чарасы болуп өттү.

Иш-чарага Ала-Бука райондук мамлекеттик администрациясынын башчысынын орун басары Асел Жунусалиева, Ала-Бука райондук билим берүү бөлүмүнүн башчысы Атамырза Баймуратов, ошондой эле Бишкек шаарынан келген Баткен жоокерлеринин республикалык комитетинин төрагасы Сатыбек Молдалиев, жазаларды аткаруу мамлекеттик кызматынын ардагери, ички кызматтын полковниги Марс Джусупов, ардагер мугалимдер, айыл аксакалдары жана мектеп жамааты катышты.  Иш-чаранын максаты – келерки окуу жылына карата окуучулардын жүрөгүндө патриоттук, жарандык жана аскердик милдеттерди калыптандырууга, өз мекенин коргоого даярдоо.

Иш-чара негизинен жогоруда айтылгандай Бишкек шаарында жашап жана иштеп жаткан үч айылдын жарандарынын башын бириктирип, келечек муундарга үлгү болчудай демилге көтөргөн Кажар айылынын кулуну, жазаларды аткаруу мамлекеттик кызматынын Аламүдүн районундагы ардагерлер кеңешинин төрагасы Анвар Мамытовдун мектепке АЧД сабагы үчүн кошулган салымы жана агартуу тармагында көп жылдар бою эмгектенген ардактуу эс алуудагы ардагер мугалимдерге сыйлык тапшыруу максатында өткөрүлдү.

Мектеп үчүн кошулуп жаткан мындай салым албетте окуучулар үчүн өтө маанилүү. Буга чейин окуучулар алып келинген заттарды сүрөттөн көрүп үйрөнүп жаткан болсо, мындан кийин алар өз көздөрү менен көрүп, түзүлүшүн жакшы үйрөнүп, терең билимге ээ болушат. Аскерге чейинки даярдык мектепте канчалык деңгээлде сапаттуу өтүлсө,эртеңки күндө биздин окуучулар армияда ошончолук татыктуу кызмат өтөп келишет.

Иш-чара келген коноктор үчүн окуучулар тарабынан даярдалган патриоттук тематикадагы концерттик программа менен коштолду. Албетте, мектеп үчүн кошулуп жаткан мындай салым жана өткөрүлүп жаткан иш-чара окуучулардын мекенчилдик сезимин дагы бир жолу ойготооруна шек жок.

Макаланы даярдаган: Д.ЭРГЕШОВА, мектептин соц.педагогу