150 Бардыгы /

        «Гуд Нейборс Интернешнл» уюму Баткенде 500 тонна жемишке ылайыкташкан 5 муздаткычы бар кампанын курулушуна 10 миллион сом ажыратат. Бул туурасында президенттин Баткен облусундагы Өкүлчүлүгүнөн билдиришти.

        Ошентип, президенттин Баткендеги өкүлчүлүгү, «Гуд Нейборс Интернешнл» уюмунун Кыргызстандагы филиалы, Баткен райондук мамлекеттик акимчилиги жана райондогу Дара айыл өкмөтүнүн ортосунда өз ара кызматташуу жөнүндө Меморандумга кол коюлду. Ушул тапта Баткен районунун Дара айыл өкмөтүндө муниципалдык вакуумдук муздаткычы бар кампа курулууда. 500 тоннага эсептелген логистикалык борбордун курулушуна Баткен облусун өнүктүрүү программасынын алкагында республикалык бюджеттен 5 миллион 853 миң сом, Дара айыл өкмөтүнүн  жергиликтүү бюджетинен 3 миллион сом бөлүнүп, бул каражатка кампанын биринчи этабы курулуп бүткөн. Эми курулушту толук кандуу бүткөрүү үчүн өнөктөш катары «Гуд Нейборс Интернешнл» уюму 10 миллион сом салым кошуп жатат. Ошентип, долбоордун жалпы суммасы 18 миллион 853 миң сомду чапчып олтурат.

        Ушул жылдын соңуна дейре аталган беш муздаткычтуу ишкананын эки муздаткычы сөзсүз ишке берилүүсү күтүлөт. Логистикалык борбордун курулушу менен аймактагы айыл чарба кооперативдердин мөмө-жемиштерин бир калыпта сактоого мүмкүнчүлүк түзүлөт. Муздаткычтуу кампа Дара айыл өкмөтүндө өрүктүн эрте бышуучу, кургатылбаган «ак өрүк» сортун жана жыл сайын аянты өсүп жаткан кулпунайды сактоого, ошону менен экспорттун өнүгүүсүнө дагы зор өбөлгө жаратмакчы.

Алишер ТОКСОНБАЕВ, өз кабарчы