234 Бардыгы /

Баткен облусунда жарым жыл аралыгында 40 чакан ишкана ачылды. Бул туурасында Президенттин Баткен облусундагы Өкүлчүлүгүнүн басма сөз кызматынан билдиришти.

Маалыматка караганда, 2024-жылдын биринчи жарым жылдыгында Баткен облусунун аймагында 2 миң 382 жумуш орун түзүлдү. Бул көрсөткүч өткөн жылдын ушул мезгилине салыштырганда 413 жумушчу орунга көп. Мынча жумуш орундары мамлекеттик, жеке менчик мекеме-ишканаларда, өнөр жай, анын ичинде кен казуу жана дагы айыл чарба тармактарында түзүлгөн кошумча жумуш орундары болуп саналат. Мындан тышкары 6 ай ичинде Баткен облусунун аймагында 40 муниципалдык жана жеке менчик киреше алып келүүчү жаңы ишканалар ачылып, 273 жаңы иш орундар түзүлдү.

Ошентип, жаңыдан ачылган 40 ишкананын арасынан өнөр жай продукцияларын өндүрүүчү 20 кичи ишкана, айыл чарба продукциясын өндүрүүчү 4 ишкана, айыл чарба продукциясын кайра иштетүүчү 7 ишкана, кызмат көрсөтүүчү 6 ишкана жана 3 жаңы соода борбору ачылды. Дал ушул ишканалардын эсебинен 394 миллион сомдук жеке инвестиция дагы кошо өздөштүрүлдү.

Алишер ТОКСОНБАЕВ, өз кабарчы