27 Бардыгы /

Ош облусуна караштуу Алай районундагы Чоң-Каракол айылынын тургундары көмүр казууга келген компаниянын техникаларын токтоосуз чыгарып кетүүнү талап кылышууда. А буга дейре көмүр кенине баруу үчүн мыйзамсыз жол салган ишканага Башкы прокуратура кылмыш ишин козгоп, 9 миң куб метрден көп мөңгү талкалангандыгын дагы билдирген.

       Алай районундагы “Загара 2” деп аталган аймактан казылуучу көмүр кенге байланыштуу нааразычылыктар далай ирет айтылгандыгын жергиликтүү тургундар ачыкташты. Маселен, аталган кыштактын тургуну Шерикбай Борбодоев кенге чейинки жолдун долбоорун чийген адистер менен чогуу жүргөн экен. Эгерде жол саланса, анда мөңгүлөрдүн талкаланып кетүү коркунучу бар экендигин эскертишкен.

        – Бул жакта ак илбирс, аюу, каман, тоо кийик, теке жана кекилик бар. Алар жер которуп кетишет. Буга улай Сиздер көрүп турган тоонун коктусунан келген суу бар. Алар ошол сууну 500-600 метр тебелеп өтүп жол салат экен. Эгер жол казылып, кокту-колотту жапса, Чоң-Каракол эли таптакыр суусуз калат. Бул суудан биз ичебиз, анан сугатка дагы пайдаланабыз. Бул айыл чөлгө айланат. Бир эле биз эмес, Ош облусу суусуз калат, анткени Ак-Буура дарыясынын башаты ушул мөңгүлөрдөн башталат! – деп тызылдады Алай районундагы Чоң-Каракол Шерикбай Бербодоев.

        Алай районунун акими Чыңгыз Бапаев  ““Кыргызкөмүр” мамлекеттик ишканасы өзүм билемдик менен иш баштаганндыгын моюндады: – “Кыргызкөмүр” мамлекеттик ишканасы бизге кат менен кайрылган. Анда Алай районунун аймагынан жол өтмөк. Биз булардын катына жооп жазганбыз, «Тиешелүү документтериңерди алып келгиле?» деп. Алар ошол документтери алып келбестен, райондун аймагына бир чакырымдан көбүрөөк жерге жол салып кирип кетишиптир. Өзүм билемдик менен. Жанагы мөңгүгө байланыштуу маселе биздин аймакта эмес, Кара-Суу районуна караган жерде.

        Айтмакчы, “Загара-2” тилкесинде жалпысынан 190 миң тоннадан ашык көмүрдүн кору бар экенин “Кыргызкөмүр” мамлекеттик ишканасынан билдиришти. Уруксаты жок эле жол салуу иштери кантип башталып кеткендигин аталган ишкананын Түштүк филиалынан эч ким түшүндүрүп бере алган жок. Ал эми Кара-Суу районунун жетекчилиги бул өңүттө үн ката элек…

Алишер ТОКСОНБАЕВ, өз кабарчы