48 Бардыгы /

Узап бара жаткан жылдын 23-ноябрында Балыкчы шаарында Борбордук Азиядагы аймактык жолдорду жакшыртуу боюнча программанын үчүнчү фазасынын алкагында курулган жаңы Туристтик кызмат көрсөтүү борборунун салтанаттуу ачылышы болуп өттү. Бул борбор Ысык-Көл облусунда туризмди өнүктүрүүдө маанилүү элемент болуп эсептелет. Бул тууралуу Экономика жана коммерция министрлигинин маалымат кызматы билдирди.
Ачылыш аземине экономика жана коммерция министрлигинин, транспорт жана коммуникациялар министрлигинин, Президенттин Ысык-Көл облусундагы ыйгарым укуктуу өкүлчүлүгүнүн, Дүйнөлүк банктын жана жергиликтүү бийлик органдарынын өкүлдөрү катышты.
Иш-чарада белгиленгендей, Балыкчыдагы Туристтик кызмат көрсөтүү борборунун ачылышы туристтер үчүн ыңгайлуу шарттарды түзүп, аймактагы пансионаттарга жана тоо-лыжа базаларына жетүү жолдорун жеңилдетет. Мындан сырткары, ал жаңы жумуш орундарын түзүүгө жана экономикалык өнүгүүгө түрткү болот.
Жаңы борбор туристтер үчүн ар кандай кызматтарды сунуштайт: маалыматтык колдоо, эс алуу зонасы, азык-түлүк жана сувенир дүкөнү, даараткана, унаа токтотуучу жайлар жана электромобилдер үчүн заряддоо станциялары. Бул объект Ысык-Көлдүн жээгинде туристтик сервис борборлорунун тармагын түзүү долбоорунун бир бөлүгү болуп саналат. Ушундай эле борборлор Түп, Теплоключенка, Тосор жана Бөкөнбаевде да ачылууда.
Долбоор Транспорт жана коммуникациялар министрлиги тарабынан Экономика жана коммерция министрлигинин Туризм департаментинин буюртмасы боюнча ишке ашырылып, Дүйнөлүк банктын финансалык колдоосу менен курулган. 2024-жылы Туристтик кызмат көрсөтүү борборлору Кыргыз Республикасында Туризмди өнүктүрүүнү колдоо фондунун башкаруусуна өткөрүлгөн.
Бул борбордун ачылышы Ысык-Көл облусундагы туристтик агымдын өсүшүнө жана Кыргызстанды эл аралык туристтик аренада бекемдөөгө шарт түзөрү күтүлүүдө.