27 Бардыгы /

«Элдин сотторго ишеними төмөн!» Бул туурасында Жогорку соттун төрагасы Медербек Сатыев Ош облустук сотунда жар салды.

Жогорку соттун төрагасы Медербек СатыевОш облустук сотунда атайын жыйын өткөрүп, иш-чарага Ош облустук сотунун, административдик соттун судьялары жана аппарат кызматкерлери, ошондой эле Сот департаментинин Ош облустук башкармалыгынын өкүлдөрү катышышты.

Адегенде Ош облустук сотунун төрагасы Мирлан Боромбаев маалымат жасап, аталган сотто 15 судья, 45 аппарат кызматкери эмгектенип, ушул жылдын 9 айында 2 223 иш каралгандыгын айтты. Баса, бул өткөн жылга салыштырмалуу 419 иш көбүрөөк каралган. Андан соң Ош облусунун Административдик сотунун төрагасы Дамир Суйналиев үстүбүздөгү жылдын 9 айында 734 иш каралып, булардын арасынан 35 иш мөөнөтү өтүп каралгандыгын айтып, мындан ары мөөнөтүн бузуу менен иштерди кароого жол берилбестигин убадалады. Ал эми Сот департаментинин Ош облустук башкармалыгынын башчысы Динислам Кожоакматов дагы маалымат берип, буга дейре айлап-жылдап аткарылбай жаткан иштерди тезинен калыбына келтирүүгө аракет жумшалгандыгын айтты. Мындан тышкары соттун чечимин убагында аткарбай жаткан жана тийиштүү форма кийбеген кызматкерлерге тартиптик чаралар көрүлгөндүгүн дагы кошумчалады.

Жогорку соттун төрагасы Медербек Сатыевэлдин сот системасына болгон ишенимдин төмөндөшү өлкөдө адилеттүүлүктү камсыз кылуу багытындагы негизги көйгөйлөрдүн бири экендигин баса белгилеп, бул абалды чукулд арада өзгөртүү зарыл экендигин эскертти.

– Сотко акыйкат издеп гана эл кайрылат. Андыктан, укугу бузулган тараптардын укугун калыбына келтирүү негизги милдеттердин бири. Соттор иштерди өз убагында жана мыйзамдуу, адилетүү, негиздүү карашы кажет! Ошол эле убакта соттордун кесиптик деңгээлин жогорулатуу боюнча дагы иш аракеттерди көрүшүбүз зарыл! – деди Жогорку соттун төрагасы Медербек Сатыев.

Белгилей кетчүү жагдай: Жогорку соттун төрагасы Медербек Сатыев республикабыздын бардык сотторун чекесинен кыдырып, жеринде орун алып жаткан көйгөйлөр менен кенен-чонон таанышып келатат.

Алишер ТОКСОНБАЕВ, өз кабарчы