6 Бардыгы /

Кыргызстандын Түштүк башкалаасында Улуттук коопсуздук мамлекеттик комитетинин Аскердик контрчалгындоо башкы башкармалыгынын 4-бөлүмүнүн жаңы имараты пайдаланууга тапшырылды. берилди. Бул туурасында атайын кызматтан билдиришти.

Аталган иш-чарага Кыргыз Республикасынын Министрлер кабинетинин төрагасынын орун басары – УКМК төрагасы Камчыбек Ташиев, жергиликтүү бийлик башчылары, ардагерлер жана башкармалыктын өздүк курамы катышты. Кыргызстан эгемендик алгандан бери УКМКнын Аскердик контрчалгындоо башкы башкармалыгынын бөлүмүнө биринчи жолу жаңы имарат салынганы маалымдалды. Жаңыланган мекемеде заманбап бардык шарттар түзүлгөн.

Өкмөт мүчөсү Камчыбек Ташиев сөз сүйлөп, мындан ары эми УКМКнын Аскердик контрчалгындоо башкы башкармалыгы тарабынан өлкөдөгү бардык аскер кызматкерлеринин ички тартибин тыкыр жөнгө салууга катуу аракеттер көрүлөөрүн убадалады: – Урматтуу президентибиз Садыр Нуркожоевичтин тапшырмасынын негизинде, мамлекетибиздеги бардык аскер кызматкерлерибиздин кызматтык шарттарын ого бетер жакшыртуу жана материалдык-техникалык базаларын заманбап чыңдоо, курал-жарактарын жаңылоо жана кубаттандыруу багытында олуттуу жумуштарды аткардык жана аткарып жатабыз. Эми мындан ары өлкөбүздөгү аскер бөлүктөрүндөгү, Куралдуу күчтөрдөгү ички тартипти бекемдөө жана ирээтке келтирүү, татыксыз, мыйзамды сыйлабаган кадрлардан тазалоо иштери күчөтүлөт…

УКМКнын Аскердик контрчалгындоо башкы башкармалыгынын 4 -бөлүмү буга чейин Советтер союзу учурунда курулган эски корпуста иштеп келишкен жана эч кандай кызматтык шарттар жаратылган эмес. Кыргыз Республикасынын Министрлер кабинетинин төрагасынын орун басары – УКМК төрагасы Камчыбек Ташиев жаңы имаратты чекесинен көрүп чыгып, бөлүмдүн жашыл аймагына арча дагы отургузду.

Алишер ТОКСОНБАЕВ, өз кабарчы