81 Бардыгы /

Жогорку Кеңештин төрагасы Нурланбек Тургунбек уулу Ош шаарын айланып өтүүчү жолдун курулушу жакында башталаарын шардана кылды. Спикер парламент жыйынында Бишкек жана Ош шаарларында жол тыгынды жоюу маселесине арналган жыйында жалпы узундугу 34 чакырымды түзгөн жолдун курулушу мамлекеттик-жеке өнөктөштүк долбоорунун алкагында жүзөгө ашырылаарын, жолду курууга даярдыктар башталгандыгын кошумчалады.

– Жалпы узундугу 34 чакырымды түзгөн жолдун курулушу мамлекеттик-жеке өнөктөштүк долбоорунун алкагында жүзөгө ашырылганы турат. Бардык керектүү техникалар тартылып, тиешелүү ченемдер жасалууда. Буюрса, февраль айынын башында курулушка байланышкан иштер кадимкидей жана толук кандуу жүргүзүлө баштайт, – деп ишендирди Жогорку Кеңештин төрагасы Нурланбек Тургунбек уулу.

Ал эми мунун алдында транспорт жана коммуникациялар министринин орун басары Бекжан Рысмендеев депутаттардын суроолоруна жооп кайтарып жатып, Ош шаарын айланып өтүүчү жолду салуу быйыл концепция сыңары гана каралып, бирок, курулуш иштери быйыл иш планга киргизилбегендигин айтканы бар.

Айтмакчы, Өзгөн шаарын айланып өтүүчү кан жол өткөн жылдын 6-декабрында президент Садыр Жапаров баштаган жоон топ аткаминердин катышуусунда ачылган. Бул – Кыргызстандагы алгачкы акы төлөнүүчү каттам. Андан өтүү үчүн жеңил унаалардан 200 сом, жүк ташуучу машинелерден 700 сом алынат. Расмий маалыматка караганда, бул айланма жол мамлекеттик-жеке өнөктөштүк ыкмасы менен жүзөгө ашырылган. Аны «Тез Жол» жана «Жагалмай» компаниялары биргеликте курган.

Алишер ТОКСОНБАЕВ, өз кабарчы