18 Бардыгы /

Президенттин Жалал-Абад облусундагы ыйгарым укуктуу өкүлү Тилек Текебаев Сузак районунун аймагындагы жазгы талаа иштерине даярдык алдындагы сугат суу каналдарын тазалоо, жээк бекемдөө жумуштары менен жеринен таанышты.

Облус башчысы Сузак райондук суу чарба башкармасынын карамагындагы Көк-Жаңгак сел каналын тазалоо, Жыгач-Коргон айылындагы Көк-Арт дарыясынын №7-жээк тосмолорунун абалы, аталган дарыянын Ынтымак көпүрөсүнүн айланасындагы кум-шагыл аралашмасын алууда жаралган кырдаалды жеринен көрдү.

Кыдыруунун жүрүшүндө Сузак айыл аймагында жайгашкан 6-сессия сугат суу каналынын тазалоо иштери менен таанышты. Ага катар Кара-Дарыя айыл аймагындагы Кара-Дарыя дарыясынын 160 метр аралыктагы жээк бекемдөө жумуштарынан кабар алды.

Быйыл дарыя жээгин бекемдөөгө республикалык бюджеттен 21 млн 760 миң сом акча каражаты бөлүнгөн. Учурда жумуштардын 60 пайызы аяктаган.

Ыйгарым укуктуу өкүл Тилек Текебаев, сугат суу мезгилине карата аймактагы бардык арык-каналдарды тазалоо жумуштарын өз убагында аткаруу зарылдыгын эскертти. Ага катар сугат сууну натыйжалуу пайдалануу аракетин көрүүнү тапшырды.

Ошондой эле сел кырсыктарынын алдын алуу маселеси орчундуу экенин айтып, тазалоо иштери жана жээк бекемдөө аракеттерин жандантуу тапшырмасын берди.

Буга чейин ыйгарым укуктуу өкүлдүн буйругу менен Сузак районундагы Көк-Арт, Кара-Дарыя жана Базар-Коргон районундагы Кара-Үңкүр дарыяларын жериндеги мыйзамсыз кум, шагыл казып жаткан жеке ишкерлерге жана жарандарга мыйзам чегинде тиешелүү чараларды көрүү максатында атайын жумушчу топ түзүлгөн.

Тилек Текебаев жумушчу топ тарабынан аныкталган фактыларды тийиштүү органдарга өткөрүү зарылдыгын белгиледи.

Бул жылы Жалал-Абад облусунда жалпы 152 чакырым арык-каналдарды тазалоо планы коюлган. Бүгүнкү күнгө карата анын 50 пайызы бүткөрүлдү.