42 Бардыгы /

2025-жылдын 2-апрелинен тарта Түштүк Кореяда, Японияда жана БАЭде жүргөн Кыргыз Республикасынын жарандары баланын чет өлкөгө чыгуусуна ишеним катты (макулдукту) аралыктан бере алышат.

2024-жылдын 13-январында Кыргыз Республикасында Америка Кошмо Штаттарында жүргөн Кыргыз Республикасынын жарандары үчүн биринчи нотариалдык аракет ийгиликтүү ишке ашырылды. Бул иш-чара нотариалдык кызматтарды санариптештирүүнүн өнүгүшүнө өзгөчө кадам болду.

Ушуга байланыштуу, 2025-жылдын 2-апрелинен тарта Түштүк Кореяда, Японияда жана Бириккен Араб Эмираттарында жүргөн Кыргыз Республикасынын жарандары баланын чет өлкөгө чыгуусуна ишеним кат (макулдук) алуу үчүн аралыктан нотариалдык аракеттерди жасай алышат.

Кыргыз Республикасынын жарандарына ыңгайлуу болушу үчүн Нотариаттын бирдиктүү маалыматтык тутумунун (МТ «Электрондук нотариат») алкагында жаңы функционал – «Жарандын жеке кабинети» түзүлдү.

Бул сервис нотариалдык кызматтарды нотариалдык кеңсеге физикалык жактан келбестен, электрондук санарип кол тамга менен кол коюу аркылуу алууга мүмкүндүк берет.

Бул кызматты пайдалануу үчүн жарандар “Электрондук нотариат” маалыматтык тутумуна төмөнкү шилтеме аркылуу өтө алат: https://en.minjust.gov.kg/.

Кошумча маалымат алуу үчүн КР Юстиция министрлигинин нотариат жана апостилдештирүү бөлүмүнө төмөнкү телефондор аркылуу кайрылсаңыз болот: 0312 62-62-10 (+191), (+189), (+143), ep@minjust.gov.kg.