33 Бардыгы /

Бүгүн, 7-апрелде Жалал-Абад шаарынын борбордук аянтында 7-Апрель – Элдик революциясында курман болгон жарандар эскерилди.

Иш-чарага Кыргыз Республикасынын Президентинин Жалал-Абад облусундагы ыйгарым укуктуу өкүлү Тилек Текебаев, шаар мэри Эрнисбек Ормоков, жергиликтүү кеңештин төрагасы Орозбек Турдубеков, мекеме-ишканалардын кызматкерлери, элдик революциянын катышуучулары жана шаар тургундары катышты.

Мында каза болгон жарандардын элесине гүл коюлуп, багышталып куран окулду.

Облус башчысы Тилек Текебаев 2010-жылдын 7-апрелиндеги элдик революция жалпы журтту бириктирип, Кыргызстандын жаркын келечеги үчүн күрөшкө чыккан маанилүү окуялардын бири экенин белгиледи.

Облус башчысы курман болгондордун жакындарына көңүл айтып, ошол учурда, апрель баатырларынын койгон талабы, бүгүн Президент Садыр Жапаровдун тушунда, анын жетекчилигинин алдында аткарылып жатканын кошумчалады.

2010-жылдын 7-апрелинде Бишкек шаарында болгон окуяларында Жалал-Абад облусунан 7 адам каза болуп, 11 адам жаракат алган.

Кыргыз Республикасынын Президентинин Жарлыктарынын негизинде Жалал-Абад облусунан 110 катышуучу “Апрель элдик революциясьнын баатыры” төш белгиси менен сыйланган.