3 Бардыгы /

Бүгүн, 9-апрелде Кыргыз Республикасынын Президентинин Администрациясында өспүрүмдөрдүн укук бузууларын жана үй-бүлөлүк зомбулукту алдын алуу боюнча ведомстволор аралык кеңешме болуп өттү.

КРдин Башкы прокуратурасынын малымат кызматы билдиргендей, кеңешмеде Балдардын укуктары боюнча ыйгарым укуктуу өкүл Асель Чынбаева жана Башкы прокурордун биринчи орун басары Баймурза Маатов сөз сүйлөштү. Жыйынга мамлекеттик органдардын, эл аралык уюмдардын жана аймактык администрациялардын өкүлдөрү катышты.

Талкуу учурунда өспүрүмдөр арасындагы укук бузуулар, мектептеги коопсуздукту камсыздоо, ошондой эле үй-бүлөлүк зомбулуктун алдын алуудагы көйгөйлөр каралды.

Жыйында үй-бүлөлүк зомбулуктун көптөгөн учурлары жашыруун калып жатканы белгиленип, аларга өз убагында чара көрүү үчүн ведомстволор аралык кызматташууну күчөтүү, маалымат алмашууну жакшыртуу жана жооптуу кызматтардын натыйжалуу ишин камсыз кылуу зарылдыгы айтылды.

Жыйындын жыйынтыгында сунуштар иштелип чыгып, мындан ары карап чыгуу жана ишке ашыруу үчүн тиешелүү мамлекеттик органдарга жөнөтүлөт.