18 Бардыгы /

Бүгүндөн, 21-апрелден тартып Кыргыз-Тажик чек арасын делимитациялоо жараяны башталды. Бул туурасында Улуттук коопсуздук мамлекеттик комитетинин жетекчиси Камчыбек Ташиев шардана кылды. Ал ошондой эле Кыргыз бийлиги үчүн “Бул маанилүү жумуш” экендигин дагы баса белгиледи.

• Лаккондон баштадык. Чек ара сызыктарынын негизинде

демаркациялык жумуштар тынымсыз жүргүзүлөт. Биздин буга акчабыз дагы, ошондой эле адам ресурстарыбыз деле жетиштүү. Кадамжайда инженердик-сапердук рота бар эле. Муну биз Баткенге көчүрүп келдик. Бул жактагы аскер кызматкерлеринин баарын эми чындап ишке салабыз! – деди Кыргыз Өкмөтүнүн мүчөсү Камчыбек Ташиев.

УКМК төрагасы Камчыбек Ташиев Кыргыз-Тажик чек арасына эки мамлекет тең өзүнчө зым тартып чыгаарын дагы сөз арасында кошумчалады.

Айтмакчы, ушул жылдын 27-февралында Жогорку Кеңештин алты комитети биргелешкен жыйынында Кыргыз-Тажик чек арасын делимитациялоо боюнча макулдашуулардын долбоорун кубаттаган. Ал эми 13-мартта Бишкекте президенттик администрациянын “Ынтымак ордо” имаратында Кыргызстан менен Тажикстандын мамлекеттик чек арасы жөнүндөгү келишимге эки өлкөнүн президенттери – Садыр Жапаров менен Эмомали Рахмон кол коюшкан. Алар – эки президент тең  чек ара келишимин “Тарыхый чечим” деп баалашкан. Буга улай Кыргызстан менен Тажикстандын президенттери – Садыр Жапаров жана Эмомали Рахмон үстүбүздөгү жылдын 31-мартында  Тажикстандын Кожент шаарында дагы ратификациялык Грамоталар менен алмашуу жөнүндө протоколго өзүнчө кол коюшкан. Бул документ алмашуу менен чек ара тактоодогу делимитация процесси дагы толук кандуу аяктады.

Расмий маалыматка караганда, Кыргызстан менен Тажикстандын ортосундагы мамлекеттик чек аранын жалпы узундугу 1006,84 чакырым. Мунун ичинен 519,9 чакырым чек ара сызыгы 2011-жылга чейин такталып, жазылып, өкмөттүк делегациялар бекиткен. Ал эми калган 486,94 чакырым тилкеси акыркы үч жыл ичинде гана араң такталды. Баса, чек ара такталбагандыктан буга дейре суу, жер, жол жана дагы жайыт талаштын кесепетинен аймакта далай чыр-чатактар катталып, а түгүл 2021-жылы апрель-май жана 2022-жылы сентябрь айларында кандуу кагылышуулар дагы жүз берген.

Алишер ТОКСОНБАЕВ, өз кабарчы