18 Бардыгы /

Бүгүн, 2025-жылдын 12-июнунда КР УКМКнын Башкы штаб-квартирасында КР Министрлер Кабинетинин Төрагасынын орун басары – УКМК төрагасы, генерал-полковник К.К. Ташиев эл аралык кинофестивалдын алкагында Кыргызстанга келген белгилүү италиялык актёр жана режиссёр Микеле Плачидо менен жолугушуу өткөрдү, ал “Спруг” криминалдык телесериалында (1984-1989-ж.ж) “Комиссар Каттанинин” ролун аткарган.

Жолугушуунун жүрүшүндө Кыргызстан менен Италиянын ортосундагы маданий кызматташтыктын мүмкүнчүлүктөрү, анын ичинде М.Плачидонун Кыргызстанда өткөрүлгөн эл аралык кинофестивалдарга катышуусу, ошондой эле Борбордук Азиядагы туристтик борбор катары Кыргыз Республикасынын эл аралык аренадагы аброюн көтөрүү маселелери талкууланды. Өз кезегинде актер Улуттук коопсуздук боюнча мамлекеттик комитеттин жетекчисинин сунуштаган демилгелерин чын жүрөктөн колдоого даяр экенин билдирип, Бишкекте жылуу кабыл алгандыгы үчүн Кыргыз Республикасынын жогорку жетекчилигине ыраазычылык билдирди. Ошондой эле баарлашуу учурунда М.Плачидо Кыргыз Республикасынын аймагында өнүктүрүүнү пландап жаткан жеке киностудиясы тууралуу маалымат менен бөлүштү.

Белгилей кетсек, Плачидонун Кыргызстанга келүүсү эки өлкөнүн маданий байланыштарын чыңдоодогу маанилүү кадам болуп эсептелинет.

Микеле Плачидо – ” Спрут” телесериалында Комиссар Каттанинин ролунан кийин дүйнөлүк атак-даңкка ээ болгон белгилүү италиялык актёр жана режиссёр. Ал ошондой эле “Три брата” (1981), “Связь через пиццерию” (1985) жана «Незнакомка» (2007) тасмаларындагы башкы эркектин ролу үчүн Италиянын башкы кино сыйлыгы болгон “Давид ди Донателлого” үч жолу көрсөтүлгөн.

Мындан улам УКМК башчысы К.Ташиев кинематография тармагындагы эки тараптуу мамилелерди өнүктүрүү жана бекемдөө максатында М.Плачидонун чыгармачылыгына ар тараптан көмөк көрсөтүүгө даяр экенин билдирди.