3 Бардыгы /

Жашырып не. Соңку тапта Кыргыз Республикасынын баардык булуң-бурчунда үй-бүлөлүк зордук-зомбулук жышааны барган сайын уламдан улам күчөөнүн гана жолунда. Ошол себептүү соңку тапта Ички иштер министрлиги, Ош облустук ички иштер башкармалыгы жана Ноокат райондук ички иштер бөлүмү тарабынан ар бир айылда “Зомбулуксуз үй-бүлө” акциясы абдан активдештирилди.

          Зульфия ЗУЛПИЕВА, Ноокат районунун акиминин орун басары: – Ноокат – Кыргызстандагы, анын ичинде Ош облусундагы дагы эң чоң райондордун бири. Калкыбыздын дээрлик 60 пайыздан ашыгын айымдар түзүшөт. Аттиң… Тилекке каршы, акыркы жылдарда буларга карата зордук-зомбулук дегеле тыйылган жок! Тескерисинче, барган сайын уламдан улам көбөйүп гана баратпайбы. Дал ошол себептүү бүгүнкүдөй иш-чараларды жергиликтүү активисттердин жана дагы калктын калың катмарынын активдүү катышуусунда үстөккө-босток өткөрүүнү ылайык таптык. Мындай жөрөлгө жарандык коомубузда жанагындай жат көрүнүштөрдү басаңдатууга гана өбөлгө жаратат терең ишеничтемин!

Шумкар АБДЫРАХМАНОВ, Ноокат райондук ички иштер бөлүмүнүн башчысынын орун басары, милициянын подполковниги: – Статистикалык акыркы маалыматтарга таянсак, Кыргызстанда ү-бүлөлүк зордук-зомбулукка кабыблгандардын катары катары күн өткөн сайын улам калыңдап гана баратат. Дал ушул себептен улам биз Ички иштер министрлиги жана Ош облустук ички иштер башкармалыгы менен биргеликте “Зомбулуксуз үй-бүлө” иш-чарасын активдештирдик. Мындай акцияны биз мындан ары Ноокат районундагы ар бир кыштакта өткөрүүнү дагы мерчемдеп жатабыз. Алардын ар бири театрлаштырылган оюн-зооктор менен дагы сөзсүз коштолот. Буюрса, мындай аракетибиз,Ю албетте, натыйжасын берээрине мен терең ишенем!

Бекназар ШАКИРОВ, Ноокат районунун казысы: – Урматтуу момун мусулмандар! Тутунган салттуу динибизде аялзатын басмырлоо, а түгүл кемсинтүү жана уруп-сабоо деген таптакыр жок! Мындай жаман адаттарга көбүнэсе интернет дагы чоң себепкер. Анткени, IT  технологияны жөнсүз шылтоолоп, адаттан тыш жоруктарыбызды эрдик сыңары мактанып, ыкчам түрдө гана жайылтып жатабыз. Ушуну тыйбайлыбы? Андан көрө Муфтияттын жана дагы диний аалымдарыбыздын акыл-насааттарын арбыныраак тыңдайлычы?!?

Асамидин МАРИПОВ, Ноокат райондук ардагерлер кеңешинин төрагасы: – Ыя, айланайындар! Ооматтуу Ноокат жергесинде балдарыбызга жана кыз-келиндерибизге, ошондой эле жалпы аялзатына карата зордук-зомбулук дегеле болгон эмес! Биз калкыбыздын бул аялуу катмарына дайыма аео менен мамиле жасап келатабыз. Ошондуктан, эбак калыптанган салттарыбызды бекем жана үзгүлтүксүз карманалы? Албетте, улуу муун өкүлдөрү – аксакалдар “Зомбулуксуз үй-бүлө” саамалыгын үзгүлтүксүз кубаттайбыз! Ошондой эле четите калбастан ар бир ушундай иш-чараларга милдеттүу түрдө сөзсүз аралашабыз!

Албетте, “Зомбулуксуз үй-бүлө” акциясы Ош облусунун эле эмес, Кыргызстандын башка баардык облус-шаарларынын калкы тегиз кубаттап, анан дагы түрдө иш жүргүзүшсө, албетте, мындай ар тараптуу иш-чаралардын сөзсүз акыбети дагы толук кайтаары шексиз!

          Алишер ТОКСОНБАЕВ, өз кабарчы, Ноокат району