18 Бардыгы /

Кыргыз Республикасынын Президентинин Жалал-Абад облусундагы ыйгарым укуктуу өкүлү Тилек Текебаев Ала-Бука районундагы “Баймак—автожол” өткөрмө бекетине жакын жерде жайгашкан “Бай-Талаа” соода-логистикалык борборунун мал өткөрүүчү пунктунун ишмердүүлүгүнөн кабар алды.

Аталган жай 2023-жылы ачылып, Кыргыз Республикасы менен Өзбекстан Республикасынын чек арасындагы маанилүү өткөрмө жайларынын бири болуп саналат. Мындагы пункт аркылуу мал-жандыктарды мыйзамдуу жана көзөмөлдөнгөн шартта өткөрүү иштери жүргүзүлүүдө.

Кыдырууда ыйгарым укуктуу өкүлгө өткөрмө пунктунун иш тартиби, ветеринардык жана санитардык көзөмөл механизмдери, чек ара коопсуздугу жана тиешелүү кызматтардын өз ара аракеттенүүсү тууралуу маалымат берилди.

Тилек Текебаев, өзгөчө басым мал-жандыктардын мыйзамсыз өткөрүлүшүнүн алдын алуу жана соода-экономикалык алакаларды ачык-айкын жол менен жүргүзүү боюнча аракеттерди күчөтүүнү тапшырды.

Ошондой эле, пункттун ишин мындан ары да ирээтке келтирүү, инфраструктурасын жакшыртуу жана жарандар үчүн шарттарды жеңилдетүү боюнча тийиштүү кызматтарга бир катар сунуштарын берди.