3 Бардыгы /

Президенттин Жалал-Абад облусундагы өкүлү Тилек Текебаев жумушчу сапарынын алкагында Ала-Бука районундагы бир катар медициналык мекемелердин абалы менен таанышты.

Облус башчы жалпы дарыгерлик практика борборунун кеңеш берүү жана диагностика бөлүмүнүн имаратынын учурдагы абалын жеринен көрүп, андагы санитардык жана техникалык шарттар боюнча маалымат алды.

Ошондой эле Ала-Бука райондук оорулардын алдын алуу жана мамлекеттик санитардык-эпидемиологиялык көзөмөл борборунун лабораториясынын абалы менен да таанышты.

Аталган эки мекеме тең 1950-жылдары курулган, бүгүнкү күндө авариялык абалда. Имараттардын эскилиги жетип, курулуш конструкцияларынын эскирүүсү, санитардык талаптарга жооп бербеген шарттар жана заманбап жабдуулардын жетишсиздиги дарыгерлердин жана калктын коопсуздугуна жана тейлөөнүн сапатына терс таасир тийгизип келе жатканы белгиленди.

Текебаев тиешелүү медициналык мекемелерге даярдалган жаңы курулуш добоорлору менен таанышып, маселени чечүү боюнча каржы булактарын аныктоо иштерин ыкчамдатууну тапшырды.