6 Бардыгы /

Кыргыз Республикасынын Президентинин Жалал-Абад облусундагы ыйгарым укуктуу өкүлүнүн орун басары Урматбек Самаев Ноокен райондук мамлекеттик администрациясында жыйын өткөрүп, “Кен-Сай” көзөмөл-өткөрмө пунктунун аймагындагы кызмат көрсөтүүчү жайлардын абалын жакшыртуу боюнча жыйын өткөрдү.

Жыйынга чек ара кызматынын, ички иштер башкармалыгынын, бажы кызматынын, Өзгөчө кырдаалдар министрлигинин, жол кыймылынын коопсуздугун камсыздоо кызматтарынын өкүлдөрү, мекеме-ишканалардын жетекчилери, айылдык кеңештин төрагасы жана айыл өкмөт кызматкерлери катышты.

Урматбек Самаев туристтерге жана облуска келген меймандарга көрсөтүлүп жаткан кызматтардын сапатына токтолуп, такси айдоочуларынын жана акча алмаштыруучу жайлардын ишмердүүлүгүн көзөмөлдөө жагы жетишсиз экенин белгиледи. Ошондой эле өткөрмө пунктунун аймагында санитардык нормаларды сактоо зарылдыгына көңүл бурду.

Жыйында тиешелүү органдарга 2025-жылдын 1-сентябрына чейин айтылган кемчиликтерди жоюу, көзөмөл жүргүзүүчү камераларды жана жол белгилерин орнотуу, санитардык талаптарга ылайык шарттарды түзүү, келген туристтерге сылык мамиле көрсөтүү боюнча кечиктирилгис чараларды көрүү милдети коюлду.

Ошондой эле Урматбек Самаев өткөрмө пунктунун абалын жеринен барып көрдү.