15 Бардыгы /

Жалал-Абад шаарындагы жаңы административдик имаратта өткөн “Түрк мамлекеттер уюмуна мүчө жана байкоочу мамлекеттерде туруктуу туризмди өнүктүрүү” аттуу эл аралык форуму өттү.

Форумга Түрк мамлекеттер уюмунун баш катчысы Кубанычбек Өмүралиев, Экономика жана коммерция министринин орун басары Медербек Туманов,  облус башчы Тилек Текебаев, жергиликтүү бийлик өкүлдөрү, Түрк мамлекеттер уюмуна мүчө жана байкоочу өлкөлөрдүн делегациялары, ошондой эле туризм тармагындагы адистер катышты.

Белгилүү болгондой, Жалал-Абад шаары 2025-жылга “Түрк дүйнөсүнүн туризм борбору” деп жарыяланган. Аталган форум мына ушул демилгени ишке ашыруу жана Түрк мамлекеттери ортосунда туризм тармагындагы кызматташтыкты өнүктүрүү максатында уюштурулган.

Иш-чарада Кыргыз Республикасынын Президентинин Жалал-Абад облусундагы ыйгарым укуктуу өкүлү Тилек Текебаев сөз сүйлөп, форумдун түрк дүйнөсүнүн туристтик мүмкүнчүлүктөрүн таанытуу жана келечекте биргелешкен долбоорлорду ишке ашыруу үчүн чоң мүмкүнчүлүк түзөрүн белгиледи.

“Жалал-Абад облусу өзүнүн кооз жаратылышы, бай тарыхы жана маданий мурастары менен туристтердин кызыгуусун арттырып келет. Биздин максат, өлкөлөрүбүздүн ортосундагы туризм кызматташуусун күчөтүү жана мындан аркы достукту бекемдөө”, – деди облус башчысы.

Форумдун жүрүшүндө катышуучуларга Түрк мамлекеттер уюмуна мүчө жана байкоочу мамлекеттерде туруктуу туризмди өнүктүрүү багыттары боюнча маалыматтар берилди.

Жалал-Абад облусунда 2025-жылдын 1-июлуна карата туристтердин саны 199 605 адамга жетти. Бул көрсөткүч 2024-жылдын 1-июлуна карата 151 061 адамга барабар болгон, башкача айтканда, быйыл өткөн жылга салыштырмалуу 48 544 туристке көп болду.