18 Бардыгы /

Кечээ, 17-сентябрда Кыргыз Республикасынын Президенти Садыр Жапаров «Кыргыз Республикасынын Жалал-Абад облусунун Жалал-Абад шаарын Манас шаары деп кайра атоо жөнүндө» Кыргыз Республикасынын Мыйзамына кол койду.

Мыйзам 2025-жылдын 10-сентябрында Кыргыз Республикасынын Жогорку Кеңеши тарабынан кабыл алынган. Мыйзамдын максаты – улуттук идеологияны чыңдоо, элдик баатыр, кыргыз элин ар кандай чабуулдардан коргогон айкѳл Манастын атын Жалал-Абад шаарына ыйгаруу болуп эсептелет.

Мыйзам менен Кыргыз Республикасынын Жалал-Абад облусунун Жалал-Абад шаарын Кыргыз Республикасынын Жалал-Абад облусунун Манас шаары деп кайра атоо каралган. Мыйзам расмий жарыяланган күндөн тартып он күн өткөндөн кийин күчүнө кирет.

Учурда Жалал-Абаддын калкы 186 миң 400дөн ашат. Шаардын жаңыланган башкы планы 2023-жылы бекитилген.

Эске салсак, ушул жылдын 3-сентябрында Жалал-Абад шаарынын мэри Эрнис Ормоков элден түшкөн суранычтарга таянып, шаардык кеңешке калаанын ысымын өзгөртүү сунушун жиберген. Эки күн өтпөй, 5-сентябрда бул тууралуу мыйзам долбоору коомдук талкуунун бирдиктүү порталына илинген. 9-сентябрда парламенттин профилдик комитети документти кезексиз карап, жактырып берген. Ал эми 10-сентябрда Жогорку Кеңештин жалпы жыйынында дароо үч окууда колдоо тапкан.

WWW.