6 Бардыгы /

Кыргыз Республикасынын Энергетика министрлиги тарабынан жүргүзүлүп жаткан  энергетика тармагын санариптештирүү жана модернизациялоо реформаларынын алкагында «КУЭТ» ААКнын филиалы Жалал-Абад электр тармактар ишканасынын Майлуу-Суу РЭТинде күз-кыш мезгилине даярдык жана жаңылануу иштери толугу менен аяктады.

Жалал-Абад электр тармактар ишканасынын маалымат кызматы  билдиргендей,Майлуу-Суу шаары боюнча 8 035 керектөөчү катталса, алардын ичинен 6 850 турмуш-тиричилик абоненттери акылдуу эсептегичтер менен камсыздалды. Эсептегичтер быйыл март айынан тартып орнотулуп, толук автоматтык дистанциялык башкарууга өткөрүлдү. Бул система керектөөчүлөрдүн үйүнө кирбей эле эсептөө процессин онлайн жүргүзүүгө шарт түзөт. Шаар тургундары мындай санариптик жаңыланууну ыраазычылык менен кабыл алышты.

Мындан тышкары Майлуу-Суу РЭТи төмөнкү оңдоо жана капиталдык жаңылоо иштерин аткарды.

Алар:

– 50 даана трансформатор жана 170,5 чакырым аба чубалгылары техникалык тейлөөдөн өткөрүлдү;

– 10 даана трансформатор жана 6,7 чакырым аба чубалгысы капиталдык оңдоодон өттү;

– Эскилиги жеткен 44 даана жыгач мамыча жаңы темир-бетон мамыларга алмаштырылды;

– Аба чубалгыларынын коопсуз иштешин камсыздоо үчүн 126,96 чакырым трасса боюнча бутактарды кыюу жана бактарды тазалоо иштери аткарылды;

– 2025-жылга пландалган кошумча 1 даана КТП орнотулуп, 0,6 чакырым 0,4 кВ аба чубалгысы курулуп, пайдаланууга берилди.

Учурда бүткөрүлгөн иштердин негизги максаты — Майлуу-Суу шаарына электр энергиясын үзгүлтүксүз, коопсуз жана сапаттуу жеткирүү, ошондой эле шаардыктарга көрсөтүлүүчү кызматтын деңгээлин жогорулатуу.

Маалымат үчүн:

Өткөн жума соңунда Майлуу-Суу РЭТинин жаңы кызматтык имараты расмий түрдө ишке берилди. Буга чейин кызматкерлер бала-бакчанын эски имаратында иш жүргүзүп келишкен. Жаңы кеңсе керектөөчүлөрдү кабыл алуу үчүн ыңгайлуу, жылуу, заманбап шарттар менен жабдылган.

Электр энергиясы боюнча суроолоруңуз болсо, күнү-түнү иштөөчү чалуу борборуна: 105, 1209 +996 772 001209 +996 702 001209 +996 556 001209 (whatsapp) номурлары аркылуу кайрылсаңыздар болот.