3 Бардыгы /

Урматтуу Жалал-Абад облусунун тургундары!

Сиздерди кирип келе жаткан Жаңы жыл майрамыңыздар менен чын дилимден куттуктайм!

Артта калып бара жаткан 2025-жыл Жалал-Абад облусу үчүн туруктуу өнүгүүнүн, ири өзгөрүүлөрдүн жана маанилүү долбоорлордун жылы болду. Экономиканын негизги тармактарында ишмердүүлүк жанданып, айыл чарба, өнөр жай, курулуш, энергетика, транспорт жана туризм багыттарында олуттуу жылыштарга жетиштик. Бюджеттик тартип чыңдалып, ишкердик чөйрө кеңейип, жаңы жумуш орундар түзүлдү. Социалдык тармакта калктын жашоо шартын жакшыртууга багытталган бир катар маанилүү иштер аткарылды. Эл аралык маанидеги долбоорлордун ишке ашырылып жатышы өзгөчө сыймык жаратат.

2025-жылы өлкөбүздүн 34 жылдык Эгемендүүлүк майрамы Манас шаарында жогорку деңгээлде жана кеңири масштабда белгиленип, Кыргыз Республикасынын Президентинин Жалал-Абад облусундагы ыйгарым укуктуу өкүлүнүн аппараты жана Манас шаарынын мэриясы жаңы административдик имаратка көчүрүлдү.

Туризм тармагында да 2025-жыл тарыхый жыл катары эсте калууда. Манас шаарынын “Түрк дүйнөсүнүн туристтик борбору” деп жарыяланышы облусубуздун эл аралык аброюн арттырып, туризмдин жаңы баскычка көтөрүлүшүнө өбөлгө түздү.

Бул жетишкендиктер өлкө жетекчилигинин ырааттуу саясатынын, жергиликтүү бийлик органдарынын жоопкерчиликтүү ишинин жана эл менен бийликтин ортосунда калыптанган өз ара ишеним менен ынтымактуу кызматташуунун жыйынтыгы болуп саналат. Алдыдагы Жаңы жылда да ушул биримдикти сактап, облусубуздун өнүгүүсү жана элибиздин жыргалчылыгын көздөгөн иш аракеттерибизди уланта бермечибиз.

Сиздерди дагы бир жолу кирип келе жаткан Жаңы жыл майрамыңыздар менен чын дилимден куттуктайм! Баарыңыздарга бекем ден соолук, иштериңиздерге ийгилик, үй-бүлөлүк бакыт каалайм!

Тилек ТЕКЕБАЕВ, Кыргыз Республикасынын Президентинин Жалал-Абад облусундагы ыйгарым укуктуу өкүлү