24 Бардыгы /

Баткен облусунда кайра жаралуучу энергия булактарын өнүктүрүү максатында ири инвестициялык долбоорлорду жүзөгө ашыруу пландаштырылууда. Бул туурасында президенттин Баткен облусундагы өкүлү Мамыржан Рахимов менен Кытайдын эң ири мамлекеттик энергетикалык корпорацияларынын бири – China Huaneng Group Co., Ltd. компаниясынын өкүлдөрүнүн жолугушуусунда ачыкталды.

Президенттин Баткен облусундагы Өкүлчүлүгүнөн билдиришкендей, инвесторлор долбоорду Кадамжай районунун Молдо-Нияз айыл өкмөтүндө жүзөгө ашырууга кызыкдар жана күн, шамал жана суудан электр энергиясын өндүрүү мүмкүнчүлүктөрүн дыкаат караштырыууда. Белгиленгендей, курулуш учурунда 500-700, ал эми ишке киргенден кийин 60-80 туруктуу жумуш орду түзүлөөрү мерчемделүүдө.

Баткен облусунун жетекчиси Мамыржан Рахимовдун айтымында, облус аймагында “жашыл энергетика” үчүн 4 552 гектар жер трансформацияланып, тиешелүү фондго өткөрүлүп берилди. Ал Баткен облусун күн нуруна бай аймак экендиги жана бул долбоор өлкөнүн Түштүк аймагынын энергетикалык коопсуздугун чыңдоого, бюджетке салыктык түшүүлөрдү көбөйтүүгө чоң салым кошоорун баса белгиледи. China Huaneng Group Co., Ltd. – Кытайдын эң ири мамлекеттик энергетикалык корпорацияларынын бири жана өлкөнүн “беш чоң” мамлекеттик энергетика компанияларынын катарына кирет.

          Алишер ТОКСОНБАЕВ, өз кабарчы