3 Бардыгы /

Бүгүн, 24-марта Манас шаарындагы “Достук” эс алуу багында “Тынчтык багы” акциясы уюштурулуп, анын алкагында көчөт отургузуу иштери жүргүзүлдү.

Манас шаарынын мэриясынын маалымат борбору билдиргендей, аталган акция Улуу Ата Мекендик согуштун, Баткен окуясынын, Чернобыль апаатынын, Аскер-Деңиз флотунун жана башка тарыхый окуяларга арналган эстеликтерди орнотуу үчүн бөлүнгөн аймагында өттү.

Иш-чарага Президенттин Жалал-Абад облусундагы ыйгарым укуктуу өкүлү Тилек Текебаев, Манас шаарынын мэри Абдупата Маткаликов, шаардык кеңештин төрагасы Аскат Талант уулу, Россия Федерациясынын Ош шаарындагы Башкы консулу Роман Свистин, Кыргызстан элинин Ассамблеясынын облустагы төрагасы Каныбек Тилекеев жана ардагерлер, коомдук уюмдардын өкүлөрү катышты.

Демилге Кыргызстан элинин Ассамблеясы тарабынан көтөрүлүп, демөөрчүлөр колдоого алган. Анын алкагында жалпы 150 даана ар кандай көчөт отургузулду.

Кошумчалай кетсек, өткөн жылы “Жеңиш” эс алуу багын реконструкциялоо иштеринин алкагында Улуу Ата Мекендик согуштун, Баткен окуясынын, Чернобыль апаатынын, Аскер-Деңиз флотунун жана башка тарыхый окуяларга арналган эстеликтерди “Достук” эс алуу багына көчүрүү демилгеленип, бул үчүн атайын жер ажыратылып берилген.

Аймак “Даңк” аллеясы болуп аталып, аны негиздөөгө жергиликтүү бюджеттен 10 млн.сом каралган.