1,544 Бардыгы /

Үстүбүздөгү жылдын 3-март күнү областыбыздын борбору Жалал-Абад шаарында Кыргыз Республикасынын Мамлекеттик туу күнү жана Ак калпак күнү салтанаттуу белгиленди. Аталган майрамдарга арналып шаар боюнча жогорку окуу жайлардын жамааттары, студенттери жөө жүрүш уюштурушту.  ЭАУнун Кесиптик багыт берүү жана коомчулук менен байланыштар кызматынан билдиришти.

Жөө жүрүш майрамдык маанайда болуп, жүрүштүн катышуучулары Кыргыз Республикасынын тууларын, транспаранттарды көтөрүп, баштарына ак калпак кийип, шаардын көчөлөрү боюнча ынтымактуу жана шаңдуу колонналарда басып өтүштү. Жөө жүрүш шаардын борбордук “Эркиндик” аянтына чейин болуп, ал жерде саат 10.00 до Кыргыз Республикасынын мамлекеттик туусу салтанаттуу түрдө көтөрүлүп, область жана шаар жетекчилиги элди куттукташты. К.Ш. Токтомаматов атындагы Эл аралык университеттин (ЭАУ) жамааты жана студенттери да майрамдык иш-чараларга активдүү катышышты. ЭАУнун колоннасын университеттин ректору, э.и.д., профессор, С.А. Өмүрзаков баштап келди. ЭАУ студенттери жогоруда аталган майрамдарга жыл сайын жогорку мекенчилдик дем менен активдүү катыша тургандыгын баса белгилеп кетели. Бул ирет да, нөшөр болгонуна карабастан, агай-эжекелерибиз жана студенттерибиз мекенчилдигин жана активдүүлүгүн көрсөтүштү.

Жалпысынан майрамдык иш-чаралар абдан кызыктуу жана шаңдуу маанайда өттү. Майрамыңыздар менен, мекендештер!

“Аймак”