1,526 Бардыгы /

БИШКЕК. Кыргыз Республикасынын Президенти Сооронбай Жээнбековдун атынан Бишкек шаарындагы перинаталдык борбордо төрөлгөн төрт эм ымыркайга жана алардын апасы Рысмат кызы Нурайымга баалуу белек-бечкектер тапшырылды. Буга улай мамлекет башчысы жаш үй-бүлөгө турак жай алуу үчүн эки миллион сомдук сертификат жана эки орундуу эки коляска дагы ыроолоду. Муну Президенттин атынан Президенттин Аппаратынын жетекчисинин биринчи орун басары Алмаз Кененбаев тартуулады. Буга улай Кыргыз Өкмөтү тарабынан жаш үй-бүлөнүн муктаждыктары үчүн 150 миё сом ажыратылды.

Айтмакчы, бөбөктөр 31-32 жумалык болуп, биринчиси 1 кило 470 грамм (кыз), экинчиси 1 кило 400 грамм (кыз), үчүнчүсү 1 кило 705 грамм (эркек), төртүнчүсү 1 кило 420 грамм (кыз) салмакта төрөлдү. Ымыркайлар биринчи он күндө туруктуу оор абалда болгондуктан, атайын респиратордук аппараттын жардамы аркасында гана дем алып жатышкан. Ымыркайларга тийиштүү медициналык кызматтар көрсөтүлүп, дарыгерлердин туруктуу кароосунда болушту.

Эске салсак, 2019-жылдын 25-февралында Бишкек шаардык перинаталдык борборунда Азамат Сманов жана Рысмат кызы Нурайымдын үй-бүлөсүндө ай-күнүнө жетпестен төрт эм (3 кыз, 1 уул) жарыкка келген. Жубайлар үч жылдан бери Бишкек шаарында батирде гана жашап келишкен. Дарыгерлердин айтымында, Рысмат кызы Нурайым Бишкек шаарында жайгашкан түркиялык «Анкалайф» медициналык борборунда тукумсуздуктан дарыланган. Ал кош бойлуу кезинде аталган клиникада каттоодо дагы турган. Азамат Смановдун билими орто, туруктуу жумушу жок, ушул тапта Бишкектеги курулуштардын биринде эмгектенет. Белгилүү болгондой, наристелерге Сооронбай, Арууке, Акчолпон, Акбермет деген ысымдар ыйгарылды.

Аталган иш-чарага Кыргызстандын вице-премьер-министри Алтынай Өмүрбекова, Кыргыз Президентинин Аппаратынын жарандык өнүктүрүү, диний жана этностук саясат бөлүмүнүн башчысы Назгүл Ташпаева жана саламаттык сактоо министри Космосбек Чолпонбаев дагы катышты.

Алишер ТОКСОНБАЕВ, өз кабарчы