1,682 Бардыгы /

БИШКЕК. Кыргыз Республикасынын Президентинин Жогорку Кеңештеги өкүлү, Кыргыз Президентинин Аппарат жетекчисинин орун басары Курманбек Дыйканбаевдин жетекчилиги астында Кыргыз Республикасынын Баш Мыйзамынын Элдик Курултайларды өткөрүүгө жарандардын укугу жөнүндө Жоболорун жүзөгө ашыруу максатында жумушчу топ атайын жыйын курду.

                   Жыйында жумушчу топтун мүчөсү, «Кыргыз Жолу» бириккен руханий коомунун теңтөрагасы Кадыр Кошалиев Курултай институтун түзүүнүн концептуалдык маселелери боюнча баяндама жасады. Ал Кыргызстандагы Курултай институтун түзүү жана мыйзамдык макамын аныктоо сунушу илимий-чыгармачыл интеллегенция тарабынан демилгеленгенин эске салды. Ошондой эле Курултай институтунун макамын  аныктоо үчүн «Элдик Курултай жөнүндө» мыйзам кабыл алуу зарылчылыгын баса белгиледи. Мындан тышкары Кыргызстандын Адилет министринин орун басары Максат Есеналиев Элдик Курултай жыйындарын өткөрүүнүн укуктук аспектилерине кеңири токтолду.

                   – «Элдик Курултай жөнүндөгү» Кыргыз Республикасынын Мыйзам долбоорун иштеп чыгуу үчүн анын концепциясын тактоо менен Элдик Курултайды чакыруунун жана уюштуруу, өткөрүү тартибинин мыйзамдык мехнизмдерин так аныктоо — максатка ылайык! — деп кошумчалады Адилет министринин орун басары Максат Есеналиев.

                   Максат Есеналиев баса белгилегендей, Элдик Курултайдын милдети Эл менен Бийликтин ортосундагы эки тараптуу байланыштарды жана пикир алмашууну туруктуу орнотуу, ар түрдүү даражадагы мамлекеттик органдарга чечимдерди кабыл алууда сунуштарды жана кеп-кеңеш берүү болуп саналат.

                   Бул талкуунун жыйынтыгында кийинки жыйында «Элдик Курултай жөнүндөгү» Мыйзам долбоорун тийиштүү тараптардын катышуусунда кеңири талкууну улантуу чечими кабыл алынды.

                   Эске салчу жагдай: Кыргыз Республикасынын Президентинин Аппарат жетекчисинин 2019-жылдын 15-февралындагы №48-буйругуна ылайык Баш Мыйзамынын Элдик Курултайларды өткөрүүгө жарандардын укугу жөнүндө Жоболорун ишке ашыруу максатында атайын жумушчу топ түзүлгөн.

Алишер ТОКСОНБАЕВ, өз кабарчы