1,896 Бардыгы /

ЖАЛАЛ-АБАД. Аксы районунун Авлетим айыл аймагынын тургуну Улуу Ата Мекендик согуштун катышуучусу Абаз Момунов аксакалдан айыл аймак башчысы жана жаштар кабар алышты.

Аксы районунун Авлетим айыл аймагынын Итагар айылынын тургуну Абаз Момунов аксакал Улуу Ата Мекендик согуштагы Улуу Жеңишти Берлинде тоскондордун бири. Ондон ашык медалдардын ээси. Учурда 97 жашта, быйыл жеңиштин 75 жылдык мааракесин тосуунун алдында турат. Кыздары кезек менен келишип карап ардактап турган чагы.

Кечээ Авлетим айыл өкмөтүнүн башчысы Нурмырза Абдыраманов, орун басары менен барып Бишкек шаарында жашап иштеп жаткан авлетимдик жаштардын бир кап уну менен Москвада иштеп жаткан авлетимдик жаштардын берип жиберген 8 килограмм күрүч,  5 килограмм шекер, 5 литр суу май, түз,самын, томат, май чайларын тапшырып, ардагердин көңүлүн көтөрүп, акыбалын сурап, ак батасын алып кайтышты. Бул Аваз аксакал үчүн чоң майрам болду, алыста жүрүп абасын унутпаган балдарга ак дилинен бата берип көзүнө жаш алды. Кубанычы чексиз болду. Бирок ардагерди кейиткен нерсе да бар экенин жашырган жок.

“Бирин -экин малымы кармаган сарайым көчүп түшүп калган, областтын губернаторуна чейин айттырдым, бирок эч кимиси ондуу жооп берген жок”,- дейт карыя, бул өтүнүчүңүздү дагы бир ирет айтабыз деп көңүл жубаттык. Саналуу калган ардагерди санаага батырбай областтын атка минерлери жардам колун сунат деген ойдобуз.

Жакындап келе жаткан майрамы менен куттуктап, ак батасын алып кайттык. Ыйык адамыбыз аман болсо экен деген тилекте болдук.

Абдымомун КАЛБАЕВ, журналист, Аксы району