1,758 Бардыгы /

Аксы району тогуз жолдун тоомунда жайгашкан район. Аэропорт бар, жаңы имарат салып даярдаган бирок ушул мезгилге чейин иштебейт. Жогорку Кеңештин төрагасы өткөн жылы келип жолунарды ондотом, оңдотуп эле тим койбой асфальтатып берем, деп элди жарым саат кол чаптырып, батасын алып кеткен. Ал сөз деле убада бойдон калды.  Убада Жогорку Кеңеште өнөкөт оору эмеспи. Азырда депутат болчулардын убадасына кирип даярдык көрүлүп жаткан болуш керек. Анткени төрагасы баш болуп алдап күйгөнбүз да. Кирпич завод убада болгон, аты жыты менен жок болду. Муну күйгөндөн айтып жатабыз. Анткени Чаткал, Ала-Бука району областтын жана республиканын борбору менен Аксы району аркалуу байланышат. Чаткал, Ала-Бука районунда иштеп жаткан тоо кенчилердин траспорттору район аркылуу өтөт. Учурда Аксы районундагы жолдор мышык ыйлай турган акыбалга жетти. Жүргүнчү ташыган, жүк ташыган айдоочулар өтө кыйналып жатышкан учуру. Кербендеги Жол пайдалануу участкасынын техникалык базасы эң жакшы, райондо асфальт заводу бар. Бул эки мекеменин 70 тен ашык жумушчулары үч айдан бери иши жок олтурат. Мындагы негизги шылтоо битум менен күйүүчү майдын жоктугу.  Республиканын жол транспорт министрлиги аталган ишканага быйылкы жылда каржы бир тыйындан каржы бербей, жумушчулар үч айдан бери айлык албай олтурат. Булардын турмуш шартынан кабар алган жан жок.  352 километр жолду аталган ишкана тейлесе үч айдан бери бир километр да жол эң жок дегенде жамак ремонту жасалган жок. Бул мекеме баш ийген Жалал Абад-Балыкчы жол тейлөө башкармалыгынын башчысы Камилжан Абдыкалыковго байланышканыбызда бир тыйын каражат жоктугун айтып, өкмөт каражат берсе эле эртеси кужулдоп иштей тургандыгын айтып актанды. Эмне өкмөт бул тармактарда иштегендерди унутуп каганбы деген да ойго кетесиң, изденип иштеген министр жок, болбосо колунда кубаттуу техникалары туруп каражат таппай олтурган министрди эмне десең болот. Мына ушундай жолдордун ункур чункурларынын убайын машина ондогондор көрүп, каргышын жол транспорт министрлиги алып турган учур. Урматтуу премьер министр уктап калган чиновниктеринизди ойготуп, бир аз каражат берип, элдин батасын алып койсоңуз жаман болмок эмес. Антпесеңиз сиз президентти элге жаман көрсөтүп жатканыңызды мен айтпасам да тушунуп турасыздар. Ушундай эле кыйын акыбалбы деп ишене албай турсаңыз бир келип кетсеңиз балким өзүңүз да ынанып бир жардам берет белеңиз деген ой да. Алтынчылар менен акылдашсаңыз бир жылдык жол ремонтко кеткен күйүүчү майды сизге белек катары деле берип коюшу эч кеп эмес. Кудай урбадыбы бул жолду ошолор бузуп жатпайбы, улуу башыңызды кичүү кылып келсеңиз уялышар. Антпесеңиз эл кыйналып, чыдамы кетип бүттү. Мына жай айлары кирип келди асфальттоо бул жакта турсун жамак ремонттон кабар жок, эртең ошону менен ачып көздү жумгуча күз келет. Эмне кылабыз. Жолдор жыртылып бүттү. Туристтер эмес өзүбүз жүрө албай калдык.

Абдымомун Калбаев, Аксы району.