1,044 Бардыгы /

Ички иштер министрлиги 13-июлда Ак үйдүн жанында «Шайлоого жол жок!» деген акция өткөрүүнү пландагандардын үчөө кылмышка шектүү болушу ыктымал деп эсептейт.

Мекеме расмий сайтына жарыялаган маалыматка караганда, 33 жаштагы эки жана 34 жаштагы бир эркек бул күнү аянттан кармалып, тергөө мекемесине жеткирилди жана аларга карата ыкчам-тергөө иштери жүрүп жатат.

Министрликтин басма сөз кызматынын өкүлү Адинай Шаршееванын айтымында, буга чейин ал адамдар WhatsApp жана Facebook аркылуу элди митингге, бийликти кулатууга үндөп, өлкө бийлигин сындаганы үчүн Тергөө кызматында «бийликти күч менен алууга чакырык» боюнча үч факт тергелип жаткан:

«11-июлда Ала-Тоо аянтында митингде жүргөн 1987-жылы туулган Т.А., 1987-жылы туулган А.С. менен 1986-жылы туулган К.Т. аттуу жарандардын жогоруда аталган кылмыш иштерине тиешеси бар болушу мүмкүн деген маалымат келип түшкөн. Тиешеси бар же жоктугун аныктоо үчүн тергөө иш-аракеттерин жүргүзүүгө ыкчам кызматтарга жогорудагы жарандардын өздүгүн тактап, тергөө органына жеткирүү үчүн тапшырма берилген. Азыркы учурда ыкчам-тергөө иш-чаралар жүрүп жатат».

Жогорудагы үч адамдан тышкары 13-июлда Ак үйдүн алдында дагы сегиз адам кармалып, кайра кое берилди.

Бишкек милициясы ал жерде жалпысынан 25-30дай адам тыюуга карабастан аянттын ар кайсы жерлерине чогулганын кабарлады.

Милиция билдиргендей, санитардык-эпидемиологиялык талаптардын бузулушуна жол бербөө жана “Тынч митингдер жөнүндө” мыйзамга ылайык алардын арасынан эң активдүү деген сегизи түшүндүрүү иштерин жүргүзүү үчүн кармалып, Биринчи май райондук милициясына жеткирилген.

Акцияга чыккандардын бири, өзүн Кудайберген уулу Тилекмат деп тааныштырган адам “Жарандык активисттер альянсы” деген кыймыл бүгүн ошол жерде “Шайлоого жол жок!” акциясын уюштурмагын, бирок лидерлерин “транспаранттары жана микрофону менен кошо кармап кетишкенин” журналисттерге айтып берген:

“Бизге эч нерсе түшүндүрүшкөн жок. Болгону, “Бийликти күч менен алууга аракет жасоо” беренеси менен иш козгоп коюшканы маалым болду. Эл согуштагыдай өлүп жатат. Биз шайлоо болбосун деген жокпуз, мөөнөтүн жылдыралы, шайлоого деген 700 миллионду элди аман алып калууга жумшайлы деп гана айтып жатабыз”.

Буга чейин бир катар саясатчылар жана коомдук ишмерлер эпидемиологиялык абалды эске алып, өлкөдө өзгөчө абал киргизүү аркылуу парламенттик шайлоону жылдырууну сунуш кылышкан. Социалдык түйүндөрдөгү талкууларда бул демилгени колдогондор да, «эпидемия учурунда шайлоо өткөрүү элди сыйлабастык болот» дегендер бар. БШК шайлоону эпидемияга карабастан өз убагында өткөрүү демократиялык өлкө үчүн маанилүү талап экенин билдирип жатат. Президент Сооронбай Жээнбеков кезектеги парламенттик шайлоону 4-октябрда өткөрүү тууралуу жарлыкка 3-июлда кол койгон.

www.