960 Бардыгы /

БАТКЕН. Баткен облусуна караштуу бир катар кыштактардын ичилүүчү таза суу көйгөйү эми чечилет. Анткени, Коомчулукту өнүктүрүү жана инвестициялоо агенттигинин (АРИСтин) аракети аркасында, аталган аймактын Жаштык жана Максат айылдарында ичилүүчү таза суу системасын куруу боюнча подряддык компаниялар менен Айыл Өкмөттөр ортосунда келишимге кол коюлду.

Ошентип, курулуш жакын арада башталып, бир жылдын ичинде бүткөрүлөт. Натыйжада эки айылда 32 чакырым суу түтүктөрү орнотулуп, 4 миң 500 адам таза суу менен камсыз этилет. Аталган эки айылды таза суу менен камсыз кылуу «Айылдарды суу менен камсыз кылуу жана санитарияны жакшыртуу» долбоорунун алкагында жөзөгө ашырылат. Долбоор жалпысынан Баткен облусунун 44 айылын ичине камтыйт. Долбоордо таза суу кирген ар бир үйгө суу өлчөгүчтөрүн орнотуу каралган, башкача айтканда, көчөлөргө суу колонкалары коюлбайт. Бул чара сууну үнөмдүү пайдаланууга гана шарт жаратат. Мындан тышкары долбоордун алкагында ичилүүчү сууну тейлөө мекемесидагы түзүлүп, анын ийгиликтүү иштеп кетишине шарт түзүү боюнча дагы чаралар көрүлөт.

«Айылдарды суу менен камсыз кылуу жана санитарияны жакшыртуу» долбоору АРИС аркылуу Баткен, Талас жана Жалал-Абад облустарындагы 86 айылда ийгиликтүү жүзөгө ашырылууда.

Алишер ТОКСОНБАЕВ, өз кабарчы