1,767 Бардыгы /

ЖАЛАЛ-АБАД. Облустук өкүлчүлүктө өткөн жыйынга Кыргыз Республикасынын Президентинин Жалал-Абад облусундагы ыйгарым укуктуу өкүлүнун орун басары Ырысбек Ызабеков, район-шаарлардын социалдык өнүгүү бөлүмдөрүнүн адистери жана медицина кызматкерлери катышты.

Жыйында кургак учук менен ооруган бейтаптарга колдоо көрсөтүү, илдеттин алдын алуу, жаңы кабылгандарды аныктоо, дарылануу ниетин бекемдөө жана сапаттуу медициналык тейлөөнүн жеткиликтүүлүгүн камсыздоо багытындагы маселелер талкууланды. Мындан сырткары ар бир аймакта ооруга чалдыккандардын укугун коргоо, ага карата тийиштүү иш аракеттердин жүрүшү боюнча маалымат берилди.

Облус башчысынын орун басары Ырысбек Ызабеков ушул жылдын алты айынын жыйынтыгы менен бир топ жылыштар бар экенин, бирок кургак учукка каршы күрөшүү аракеттери жеткиликтүү жүрбөй жатканын айтты. Ага кабылган жарандарга социалдык көмөк көрсөтүүгө жергиликтүү бюджеттерден жетиштүү деңгээлде каражат бөлүнүшү керектигин билдирди.

Жалал-Абад облусунда өткөн жылы кургак учук оорусу 614 адамда жаңы катталган. Адситердин айтымында, коронавирус инфекциясы кургак учукка каршы күрөштө жетишилген прогрессти бир топ артка тарткан. Мындан улам 2020-жылдан тарта илдетке каршы күрөштүн натыйжалуулугун арттыруу максатында USAIDдин “Кургак учук менен ооруган бейтаптарды колдоо” долбоору менен облустык ыйгарым укуктуу өкүчүлчүлүгү тарабынан “Жалал-Абад облусу кургак учуксуз” стратегиясы иштелип чыккан. Ал Кыргызстандагы Улуттук Кызыл Ай Коому, “Доор” коомдук фонду менен биргеликте ишке ашырылууда.