681 Бардыгы /

БАТКЕН. Баткен облусундагы Орто-Боз Айыл Өкмөтүндө аткезчиликке каршы күч органдары жана чек арачылардан турган атайын топторду түзүүгө байланышкан жыйын аяктады. Бул иш-чарага президенттин Баткендеги ыйгарым укуктуу Өкүлү Абдыкарим Алимбаев, УКМКга караштуу Чек ара кызматынын Баткен аймактык бөлүмүнүн башчысы Кыялбек Төлөнбаев, ички иштер органдарынын өкүлдөрү жана жергиликтүү калк активдүү катышты.

Атайын жыйын маалында Тажикстандан аткезчилик менен жүзүм ташып келе жатып кармалган кыргызстандык айдоочуларды алып келишип, алардын аракетин бийлик өкүлдөрү катуу сынга алышты. Себеби, ушул жылдын 6-октябрында Баткен районунун Жаңы-Бак аймагында Тажикстандан 22 тонна жүзүм ташып келаткан жети автоунаа кармалган. Алдын ала эсептөөлөргө караганда, жүзүмдүн жалпы наркы 3 милион 650 миң сом деп бааланууда. Президенттин Баткендеги ыйгарым укуктуу Өкүлү Абдыкарим Алимбаев аткезчиликтин жолун бууш үчүн элдик кошуун, ички иштер органдарынын өкүлдөрү жана чек ара кызматынын өкүлдөрүнөн куралган атайын топторду дагы түзүп, чек ара өткөрмө бекеттерин уюштурууну сунуш этти. Быйылкы апрель айынын соңунда чек арадагы жаңжалдан кийин жергиликтүү эл арасында коңшу өлкөгө аткезчиликти токтотуу талабы күчөгөн. Мыйзамсыз аракетти көзөмөлдөө үчүн атайын элдик кошуун дагы түзүлгөн. Тилекке каршы, калк арасында аткезчилик дагыле токтобой жаткандыгы айтылып келатат.

Быйыл 8-апрелден 1-майга чейин созулган Кыргыз-Тажик чек арасындагы куралдуу кагылышта Кыргызстандан 36, Тажикстандан 19 адам бейажал набыт тапкан. А түгүл кошуна эки өлкө муну үчүн бири-бирин  айыпташып, буга удаа кылмыш иштерин дагы козгошкон. Акырында Кыргызстан коңшу өлкө менен чек арасын бир тараптуу жапкан эле.

Кыргызстан менен Тажикстандын чек арасынын узундугу 970 чакырым. Анын 519 чакырымы такталган, калганы талаштуу жер тилкеси болуп саналат. Талаштуу тилкелердин дээрлик бардыгы калк жыш жайгашкан аймактар. Анда жашаган эки эл өз ара соода-сатык алакасын тынымсыз жүргүзүп келишкен.

Алишер ТОКСОНБАЕВ, өз кабарчы