1,260 Бардыгы /

Өткөн аптанын 27-октябрь күнү Бишкектеги Германия элчилиги тарабынан Сузактагы өтө жакыр 401 үй-бүлөгө гуманитардык жардам берилди. Бул тууралуу “Мекеним Ала-Тоо” коомдук бирикмесинин төрагасы Давлет Арзикулов билдирди.

Сузак районунун аймагында жайгашкан 13 айыл аймак, бир шаарчага жана балдар үйүнө Германия элчилиги тарабынан өтө жакыр 401 үй-бүлөгө  501 250 сомдук гуманитардык жардам таратылды. Гуманитардык жардам Германия Федеративдик Республикасынын Кыргызстандагы элчилиги тарабынан каржыланып, долбоор “Мекеним Ала-Тоо” коомдук бирикмеси аркылуу ишке ашырылды.Экономикалык катчылыкты эске алып, калкты азык -түлүк менен камсыздоо үчүн “Мекеним Ала-Тоо” коомдук бирикмесинин төрагасы Давлет АРЗИКУЛОВ долбоор жазган.

“Бишкектеги Германия элчилиги 5 000 еврого чейинки долбоорлорго жардам беребиз деп өз сайтына жайгаштырган. Ковид мезгилинде тамак-аш, медициналык каражаттар тартыш болгондуктан ушул багытта долбоорлорду кабыл алышкан. Анын натыйжасында районго жогоркудагы суммада гуманитардык жардам көрсөтүлдү. Мында бир үй-бүлөгө күнүмдүк турмушта колдонулуучу алты түрдүү тамак азыктар салынган. Анын жалпы наркы 1250 сомду түздү”,- дейт Д.Арзыкулов.

Анын айтымында гуманитардык жардам алуучулардын тизмесин Сузак райондук мамлекеттик администрациясынын кызматкерлери, айыл өкмөт башчылар, соцкызматкерлер менен биргеликте аныкташкан. Гуманитардык жардам райондук мамлекеттик администрациянын алдында айыл өкмөтүнүн соцкызматкерлери, айыл башчыларынын көмөгү астында бөлүштүрүлүп айылдарга жеткирилген. Берилген гуманитардык жардамдагы бир үй-бүлөгө ылайыкталган азык-түлүк пакетинде 10 килограмм ун, 5 килограмм макарон, 2 литр май, 1 кило ак кант, 6 даана самын, 1 таңгак кара чай салынган.

Буга чейин Бишкектеги Германия элчилиги 2020-жылы Базар-Коргон элине 837 миң сомдон ашык азык-түлүк сатып алып берген. Ал эми быйыл июль айында Ноокен элине 500 миң сомдон ашык азык-түлүк тараткан.

Эске сала кетсек, Сузак районунда 300 миңден ашуун эл жашайт, 13 айыл өкмөт, 1 шаарча жана 125 айыл бар.