912 Бардыгы /

ЖАЛАЛ-АБАД. Бүгүн, 18-ноябрда Кыргыз Республикасынын Президентинин Жалал-Абад облусундагы ыйгарым укуктуу өкүлү Абсаттар Сыргабаев Улуттук энергохолдингдин башчысы Таалайбек Байгазиев жана «Жалалабатэлектронун» жетекчиси Азамат Паизов менен жолугушту. Бул тууралуу өкүлдүн басма сөз катчысы маалымдады.

Маалыматка ылайык, Жалал-Абад  облусунун аймагында күз-кыш мезгилинде жарандарды электр энергиясы менен камсыздоонун абалы, электр энергиясын колдонууда кубаттуулукка киргизилген чектөөлөр боюнча сөз болду.

Облус башчысы тармакта жаралып жаткан тартыштыктан улам, аны рационалдуу пайдалануу зарылдыгын белгиледи. Бул багытта облуста мектеп жана башка социалдык объектилерди альтернативдүү жылытуу тутумдарына кошуу иштери жүрүп жатканын белгиледи. Абалдан чыгуу багытында аймактарда жергиликтүү бийлик тарабынан мүмкүн болгон жардамдар көрсөтүлөөрүн кошумчалады.

Жолугушууда алдыдагы жылдары облус аймагында сууну натыйжалуу пайдалануу менен бир катар чакан ГЭСтерди куруу пландары бар экени белгиленди.