2,442 Бардыгы /

          БАТКЕН. Президент Садыр Жапаров “Кыргыз Республикасынын Баткен облусунун Лейлек районунун Исфана шаарын кайра атоо жөнүндөгү” Жарлыкка кол койду.

Баса, Кыргыз Республикасынын Министрлер Кабинетинин жыйынында мамлекет башчысы Исфана шаарын Раззаков шаары деп өзгөртүү демилгесин өзү көтөргөн. Жарлыкка ылайык Кыргыз Республикасынын мамлекеттик кызыкчылыктарын коргоо, мындан ары улуттук, тарыхый каада-салттардын жана баалуулуктардын негизинде жарандарды руханий-адеп-ахлактык тарбиялоону жакшыртуу, Кыргыз Республикасынын чыгаан мамлекеттик жана саясий ишмери Исхак Раззакович Раззаковдун ысымын түбөлүккө калтыруу максатында, анын мамлекеттүүлүктү калыптандырууга жана өнүктүрүүгө сиңирген зор эмгегин эске алып, туулган күнүнүн 110 жылдыгына байланыштуу Кыргыз Республикасынын Конституциясынын 71-беренесин жана 86-беренесинин 2-бөлүгүн жетекчиликке алып, токтом кылынды.

          Буга ылайык Кыргыз Республикасынын Министрлер Кабинети эки айлык мөөнөттө Баткен облусунун Лейлек районунун Исфана шаарын Кыргыз Республикасынын Баткен облусунун Лейлек районунун Раззаков шаары деп кайра атоо маселесин белгиленген тартипте дыкаат карамакчы. Буга улай Кыргыз Республикасынын Мыйзамынын тиешелүү долбоору дагы иштелип чыгат. Андан ары Жогорку Кеңештин кароосуна киргизилет.

          Алишер ТОКСОНБАЕВ, өз кабарчы