1,473 Бардыгы /

ЖАЛАЛ-АБАД. Кыргыз Республикасынын ИИМдин“Шумкар” атайын багыттагы полкунун түзүлгөндүгүнүн 8 жылдык мааракеси Жалал-Абад шаарында белгиленди.

Жалал-Абад ОИИБдин басма сөз кызматынын маалыматына ылайык,

майрамдык иш-чарага Жалал-Абад ОИИБдин начальниги милициянын полковниги Ашим Тагаев катышып, өздүк курамды майрамдары менен куттуктады.ИИМдин“Шумкар” АБПнын Жалал-Абад шаарындагы өзүнчө ротасынын командири милициянын полковниги Равшан Кожобеков спецназдын түзүлгөн күнүнө карата ШРИИБдер жана күч түзүмдөрү арасында волейбол оюну уюштурулганын белгиледи.

Волейбол оюну жаштар жана 40 жаштан жогору курактагылар арасында 2 категорияда өткөрүлүп, жалпы 16 команда катышты.

Жыйынтыгында жаштар арасында 1-орунду ИИМдин Ички аскерлеринин 704 аскер бөлүгү, 2-орунду ИИМдин“Шумкар” АБПнын Жалал-Абад шаарындагы өзүнчө ротасы, 3-орунду Коргоо Министрлигинин Көк-Жаңгак шаарындагы“Илбирс” бригадасы багындырды.

Ал эми 40 жаштан жогорку курактагылар арасында 1-орунга ИИМдин “Динамо” курама командасы, 2-орунга “Жоролор” командасы, 3-орунга “Барпы” командасы татыктуу болушту.

Жеңүүчүлөргө уюштуруучулар тарабынан кубок, диплом жана баалуу белектер ыйгарылды.

Мындан сырткары Ош шаарында болуп өткөн самбо боюнча мелдеште байгелүү орундарга жетишкен кызматкерлер бүгүн 17-январда Жалал-Абад ОИИБдин имаратында сыйланышты.