1,176 Бардыгы /

Ар бир кризис – бул чоң мүмкүнчүлүк!

Уинстон ЧЕРЧИЛЛЬ,

Англиянын экс-премьер-министри

Кыргызстандын Түштүк Башкалаасында Ош облусунун жана Ош шаарынын 200дөн ашуун жарандык активисти – жалаң каймактары чогулуп, атайын жыйын-масилет курушуп, Президент Садыр ЖАПАРОВго Элдик Курултай институтун чукул арада ишке киргизүүнү талап кылган атайын Кайрылуу жолдошту. Өлкө башчысы бачым мындай кадам жасабаса, бүгүнкү көп кырдуу кризис бара-бара өөрчүп олтуруп, а түгүл жер-жерлерде социалдык жана саясий жарылуулар үстөккө-босток жүз берээрин дагы абдан катуу эскертишти.

Абсаттар ЖОЛДОШЕВ, эмгек ардагери: – Президент Садыр Жапаров жеке өзүнүн демилгеси аркасында өткөн 2021-жылдын 5-майында Кыргыз Республикасынын Баш мыйзамынын 1-бабынын 7-беренесине “Элдик Курултай – Эл Бийлигинин кеңешүүчү, консультативдик жана координациялоочу Жогорку органы!” – деген түзөтүү киргизилген. Тилекке каршы, бул берене эмдигиче ишке кире элек, мындайча айтканда, урунулбастан жөн эле турат. Мына ушунун кесепетинен Кыргызстанда жемкорлук ашкере күчөп, ал эми карапайым калктын турмуш-шарты күн өткөн сайын ого бетер оорлошуп гана баратат…

 Абдумажид АРЫНОВ, коомдук ишмер: – Элдик Курултай институту кыргыздарда тээтигил 7-8-кылымдарда эле негизделген. Дал ошондо калкыбыз өтө олуттуу – тагдыр чечүүчү маселелерин ушундай көпчүлүк – Улут каймактары активдүү катышкан Чоң жыйында  ырааттуу жана адилет түрдө эле жайгарып келишкен. Биз дагы дал азыр ушул принцип менен ийгиликтүү ийиндеше иштесек, бүгүнкү парламенттик жана өкмөттүк кризиске биротоло чекит дагы коюлмак. Эң эле башкысы: Бийлик бутактарынын  дагы жоопкерчилиги ого бетер жогоруламакчы.

Барпы БАРАТОВ, Ош шаарынын тургуну: – Элдик Курултай  институтун дал ушул тапта жандандыруу – учурдун эч кечиктирилгис талабы! Бирок, бул орчундуу иш-чарага делегеттарды – Өкүлдөрдү шайлоодо регионалдык, трайбалисттик жана партиялык өтө жаман адаттардан тыш болгонубуз оң! Антпесек, дал ушундай акмак илдетибиз бизди ичтен иритип, түгөнбөс чыр-чатактарга жол ачып, а түгүл бара-бара Кыргызстандын Жер бетинен жок болуп, Дүйнөлүк картадан чийилип кетишине дагы олуттуу коркунуч туудураары шексиз!

Манас ЭРГЕШОВ, жарандык активист: – Мына, эгемендүүлүгүбүздүн 31 жылынын ичинде биз ич ара араздашып, анан дагы бири-бирибизден өлүп-тирилип так талашып, деги эмне таптык?!? Намыстанбайлыбы, ыя, айланайындар? Жарандык согуштан көп жылдар бою башы чыкпаган Тажикстан экономикалык жактан бизден алдаганча озуп кетпедиби…   Ал эми Өзбекстан, Казакстан жана Түркмөнстан жөнүндө кеп жок! Булардын ыкчам өнүгүп бараткандыгын көрүп, чындыгында, арданасың, эй?!?

Бахадыр НАРМЫРЗАЕВ, “Лөлүлөр” коомунун төрагасы: – Бүгүн бизге, бүтүндөй кыргызстандыктарга, ар тараптуу өнүгүүбүз үчүн эң ириде ыктымакчылык гана керек! Мындан башка дегеле жол жок! Эгерде азыр бирикпесек, катуу кетсем, кечирип коюңуздар, ордубузда тоңуп катып калабыз, же чачырап, азып-тозуп, биротоло жок болобуз…

Аида ТУРГАНОВА, жарандык активист: – Аялдар Кыргызстандын калкынын 65-70 пайызын түзөт. Демек, биз – коомубуздагы зор күчпүз! Тилекке каршы, эми ошол күч-дараметибизди эмдигиче толук кандуу пайдаланбай келатабыз. Анткени, биздин кайдыгерлигибиз жана кашаңдыгыбыз кендирибизди куп гана кесип жаткан чагы. Буга улай оор мүшкүл башыбызга түшүп, көпчүлүгүбүз – жалаң гана айымдар гөр тиричиликтин кесепетинен Орусия, Казакстан, Түштүк Корея, Түркия, АКШ өңдөнгөн өлкөлөрдө дагыле тентип иштеп, бала-чакабызды багып жүрөбүз.

Азиза АЙДАРОВА, Кара-Суу районундагы Аймактык Кеңештин төрайымы: –  Көрдүңүздөр го, соңку тапта жер-жерлерде, анан дагы борборубуз Бишкекте азыркы Бийликке карата тенденция (жышаан) абдан активдешти. Кур дегенде кичине акыл токтотуп, ойлонбойлубу, туугандар? Анан дагы намыстанбайлыбы? Төрт президентибизди тактысынан кууп тындык. А дагы бирөөсүн түрмөгө тыктык. Мындан биз эмне таптык? Өнүгүп-өсүп кеттикпи? Жыргап жашап калдыкпы? Тескерисинче, бүтүнөй Дүйнө жүзүнө шерменде гана болдук. Эми  минтип  “Садыр Жапаров жоголсун!” деп олтурабыз. Эгерде кымындай абийириңер болсо, бул уяты жокторду  ээрчибегиле?!?

Ошентип, Ош жергесинин (Ош облусунун жана Ош шаарынын) каймактары – жарандык активисттери Кыргыз Бийлигине өз позициясын ачыкташып, өлкөбүздө Элдик Курултай институтун токтоосуз орнотууну сунуш этишти. Эми бул жарандык демилге президент Садыр Жапаров тар абынан колдоо табаар бекен? Аман турсак, муну дагы көрө жатаарбыз…

Алишер ТОКСОНБАЕВ, өз кабарчы, Ош шаары